सोलापूर : हॅलो महाराष्ट्र – सोलापूरमध्ये एक धक्कादायक घटना घडली आहे. यामध्ये पत्नीने गळफास घेऊन आत्महत्या केली आहे. दारुसाठी पतीने मुलाच्या पायातील पैंजन मोडल्याने पती पत्नींमध्ये कडाक्याचे भांडण झाले. याच भांडणातून प्रतिमा बदडे यांनी टोकाचे पाऊल उचलत प्रतिमा हिने राहत्या घरात साडीने गळफास घेऊन आत्महत्या केली आहे.
मृत प्रतिमा बदडे हिने आत्महत्या केल्याचे सासू सुनीता अशोक बदडे यांच्या निदर्शनास आल्यावर त्यांनी मुलगी सपना बाळू ढोबळे हिच्या मदतीने सून प्रतिमा हिस खाली उतरवून उपचारासाठी खासगी रुग्णालयात दाखल केले. मात्र रुग्णालयात दाखल होण्यापूर्वीच प्रतिमा बदडे यांचा मृत्यू झाला होता.
प्रतिमा सोमनाथ बदडे असे आत्महत्या केलेल्या विवाहितेचे नाव आहे. या प्रकरणी प्रवीण बाळासाहेब मायणे यांनी पोलीस ठाण्यात तक्रार दाखल केली. मृत प्रतिमा हिचा सात वर्षांपूर्वी सांगोला येथील सोमनाथ अशोक बदडे यांच्याशी विवाह झाला होता. या दाम्पत्याला लग्नानंतर एक मुलगा, एक मुलगी असे दोन अपत्य आहेत. छोट्याशा कारणावरून प्रतिमाने टोकाचे पाऊल उचलल्याने संपूर्ण गावात हळहळ व्यक्त केली जात आहे.
