नागपूर : भाजप आता विधान परिषदेतील सर्वात मोठा पक्ष झाला आहे. भाजपचे विधान परिषदेत २१ सदस्य झाले आहेत. त्यामुळे भाजपला अाता विधान परिषदेतील सर्वात मोठा पक्ष म्हणून मान्यता मिळणार आहे. भाजपचे सद्याचे सभापती रामराजे नाईक निंबाळकर यांना पाय उतार व्हायला लावायची भाजपची योजना असल्याचे बोलले जाते. हल्लाबोल आंदोलन आणि विधी मंडळातील आक्रमकपणा यामुळे भाजप राष्ट्रवादीच्या विरोधात इरीला पेटले आहे. त्याचाच एक भाग म्हणून विधान परिषदेच्या सभापतींना पायउतार करून त्यांच्या जागी भाजपायी बसवण्याचा बेत भाजपने आखल्याचे राजकीय वर्तुळात बोलले जाते. तर उपसभापती पदावर असलेले माणिकराव ठाकरे निवृत्त झाल्याने उपसभापती याच अधिवेशनात निवडले जाण्याची शक्यता आहे. गेल्या काही दिवसांपासून भाजपवर नाराज असलेल्या शिवसेनेची उपसभापती पदी वर्णी लागेल असे बोलले जात आहे.
