हॅलो बॉलिवूड ऑनलाईन। मराठमोळी अभिनेत्री सोनाली कुलकर्णीच्या वडिलांवर अज्ञाताने हल्ला केल्याची बातमी समोर येत आहे. त्यांच्या घरी अज्ञाताने घुसखोरी करण्याचा प्रयत्न केल्याची ही घटना आहे. सोनालीच्या घरी तिच्या वडिलांवर अज्ञाताने हल्ला केल्या प्रकरणी पुणे – निगडी पोलिस स्टेशनमध्ये तक्रार दाखल करण्यात आली आहे. या प्रकरणाचा निगडी पोलिस अधिक तपास करत आहेत.
https://www.instagram.com/p/CJfVKpOra_C/?utm_medium=copy_link
मिळालेल्या माहितीनुसार, अभिनेत्री सोनाली कुलकर्णी यांच्या पुण्यातील निगडी येथे असणाऱ्या आई वडिलांच्या घरी चोरीचा प्रयत्न झाला आहे. यावेळी चोरट्याने सोनालीच्या वडिलांवर चाकूने वार केला आहे. यामध्ये ते किरकोळ जखमी झाले आहेत. अजय शेगटे ( वय २८) असे पोलिसांनी ताब्यात घेतलेल्या युवकाचे नाव आहे. सोनालीचे घर पुणे -निगडी प्राधिकरण येथील सेक्टर क्रमांक २५ येथे स्थित आहे. सकाळी सातच्या सुमारास अजय त्यांच्या घरात शिरला होता आणि त्यावेळी घरी सोनालीची आई व वडील मनोहर कुलकर्णी दोघेच होते. मनोहर कुलकर्णी रिटायर्ड आर्मी डॉक्टर आहेत. त्यामुळे प्रसंगावधान दाखवून त्यांनी परिस्थिती हाताळली.
https://www.instagram.com/p/CDYhi_5g2Pg/?utm_medium=copy_link
कुणीतरी चोरीचा प्रयत्न करीत असल्याचे निदर्शनास आल्यानंतर सोनालीच्या वडिलांनी त्याला अटकाव करण्याचा पुरेपूर प्रयत्न केला. त्यावेळी या चोरट्याने चाकूने त्यांच्यावर वार करीत हल्ला केला. यामुळे सोनालीच्या वडिलांना किरकोळ जखमा झाल्या. याबाबत परिसरातील नागरिकांना माहिती मिळताच त्यांनी लगेचच जमाव करून अजयला पकडले. त्यावेळी त्यांच्यातही झटापट झाली. नागरिकांनी पोलिसांना कळविताच काही वेळातच घटनास्थळी पोलिस दाखल झाले आणि त्यांनी अजयला ताब्यात घेतले. या संदर्भात निगडी पोलीस अधिक तपास करीत आहेत, अशी माहिती मिळत आहे.