हॅलो महाराष्ट्र ऑनलाइन | मुंबई येथील क्रूझ पार्टी नंतर राज्यातील राजकीय वातावरण गरम झालं असून राष्ट्रवादी काँग्रेसचे नेते आणि राज्याचे अल्पसंख्याक मंत्री नवाब मलिक यांनी विरोधी पक्षनेते देवेंद्र फडणवीस यांच्या वर ड्रग प्रकरणी गंभीर आरोप केले आहेत. नवाब मलिक सातत्याने पत्रकार परिषद घेऊन भाजपला धोबीपछाड देत आहेत. दरम्यान नवाब मलिक यांच्या या लढ्याचे मुख्यमंत्री उद्धव ठाकरे यांनी कौतुक केले असून गुड गोईंग नवाबजी अशी कौतुकाची थाप मारली आहे.
गेल्या काही दिवसांपासून मलिकांनी भाजपविरोधात जोरदार मोहीम उघडली आहे. आता तर मलिकांनी थेट देवेंद्र फडणवीस यांच्याविरोधात आरोपांची मालिका सुरु केलीय. फडणवीस यांच्या आशीर्वादानेच राज्यात ड्रग्सचा बाजार सुरु झाल्याचा आरोप मलिकांनी केला होता. या सर्व . पार्श्वभूमीवर मुख्यमंत्री उद्धव ठाकरे यांनी मलिकांचं गुड गोईंग अशा शब्दात कौतुक केल्याची माहिती मिळत आहे.
नवाब मलिक यांनी आतापर्यंत ज्या पद्धतीने एनसीबीच्या कारवाईवर प्रश्नचिन्ह उपस्थित करताना व्हिडिओ क्लिप, कागदपत्रे सादर केली, त्याचा उल्लेख करीत मलिक यांचं कौतुक केलं. तसंच, ‘मलिक यांनी जी भूमिका घेतली आहे, ती अशीच पुढे सुरू ठेवावी,’ अशी अपेक्षा मुख्यमंत्री उद्धव ठाकरे यांनी व्यक्त करताच सर्व मंत्र्यांनी या लढ्याला पाठिंबा दर्शवला.
