नांदेड : हॅलो महाराष्ट्र – नांदेड जिल्ह्यातील हदगाव तालुक्यातील वडगाव याठिकाणी एक मन हेलावून टाकणारी घटना घडली आहे. यामध्ये एका प्रेमीयुगलाने विष प्राशन करून आपल्या लव्ह स्टोरीचा भयानक शेवट केला आहे. या संबंधित तरुणाने मध्यरात्री आपल्या मोबाइलवरून स्वत:च्या श्रद्धांजलीचे फोटो व्हॉट्सअ‍ॅपला स्टेटसला ठेवून हे टोकाचे पाऊल उचलले. सोमवारी पहाटे काही मित्रांनी त्याचं स्टेटस पाहून त्याच्याशी संपर्क साधण्याचा प्रयत्न केला. पण दोघांनीही फोन उचचला नाही. यानंतर हि सगळी घटना उघडकीस आली.
संबंधित प्रेमीयुगुलाने रविवारी मध्यरात्री वडगाव येथील शेतशिवारात जाऊन आत्महत्या केली. दुसऱ्या दिवशी सकाळी सातच्या सुमारास या दोघांचे मृतदेह आढळून आले. या घटनेची माहिती मिळताच तामसा पोलिस घटनास्थळी दाखल झाले. यानंतर पोलिसांनी मृतदेह ताब्यात घेऊन शवविच्छेदनासाठी पाठवले. तसेच पोलिसांनी आकस्मिक मृत्यूची नोंद करून घटनेचा पुढील तपास सुरु केला आहे.
काय आहे नेमके प्रकरण ?
हदगाव तालुक्यातील वडगाव या ठिकाणच्या एका 22 वर्षीय तरुणाचे गावातील एका 18 वर्षीय तरुणीसोबत प्रेमसंबंध सुरू होते. दोघांचं एकमेकांवर जिवापाड प्रेम होते. दोघांना एकमेकांशी लग्न करायचं होतं. पण घरच्यांचा या दोघांच्या लग्नाला विरोध होता. त्यामुळे हे प्रेमीयुगुल मागच्या काही दिवसांपासून चिंतेत होते. याच कारणामुळे नैराश्येत जाऊन त्यांनी रविवारी रात्री वडगाव येथील शेतशिवारात जाऊन विष प्राशन करून आपल्या आयुष्याचा शेवट केला. मारण्याअगोदर दोघांनीही आपापल्या फोनवरून स्वत:च्याच श्रद्धांजलीचे व्हॉट्सअ‍ॅप स्टेटस ठेवलं होतं. दुसऱ्या दिवशी सकाळी या प्रेमीयुगुलाच्या काही मित्रांनी हे स्टेटस पाहिल्यानंतर हि घटना उघडकीस आली. तामसा पोलिस या घटनेचा पुढील तपास करत आहेत.