हॅलो महाराष्ट्र ऑनलाईन : करोनावरील उपचारासाठी प्रभावी ठरणाऱ्या रेमडेसिवीर इंजेक्शनचा राज्यभरात तुटवडा निर्माण झाला आहे. तर, एकीकडे सत्ताधारी आणि विरोधकांमध्ये आरोप- प्रत्यारोप सुरु आहेत. रेमेडेसिवीर इंजेक्शन खरेदी करण्यासाठी अन्न व प्रशासन मंत्री डॉ. राजेंद्र शिंगणे यांची परवानगी घेतल्याचा दावा भाजपनं केला होता. मात्र, शिंगणे यांनी भाजपचा दावा फेटाळून लावत या प्रकरणी महत्त्वाचा खुलासा केला आहे.
राजेंद्र शिंगणे यांनी मंगळवारी रात्री एक व्हिडिओ ट्विट करत भाजप नेत्यांवर निशाणा साधला आहे. ‘रेमडेसिवीर इंजेक्शनचा पुरवठा व साठा यावरुन उलट सुलट तर्क लावले जात आहेत. यावरुन भाजप माझ्या नावाचा अपप्रचार करत आहे. कोणताही पक्ष वैयक्तिकरित्या इंजेक्शनचा साठा खरेदी करु शकत नाही. त्यांना तो सरकारला द्यावा लागतो, असं शिंगणे यांनी म्हटलं आहे.
‘भाजप रेमडेसिवीरचा साठा विकत घेऊन मला देणार होते अशी उलट सुलट चर्चा समाज माध्यम व सोशल मीडियावर सुरु असून ते पूर्णपणे चुकीच आहे,’ असं स्पष्टीकरण शिंगणे यांनी दिलं आहे. अन्न व औषध प्रशासन विभागाचे आयुक्त अभिमन्यू काळे यांची मंगळवारी तडकाफडकी बदली करण्यात आली आहे. रेमडेसिवीर इंजेक्शन उत्पादक कंपन्यांकडून उपलब्ध करुन घेण्यात अपयश आल्याचा ठपका ठेवत ही बदली करण्यात आली असल्याची चर्चा आहे. अभिमन्यू काळे यांच्याकडे असलेली आयुक्तपदाची जबाबदारी आता परिमल सिंह यांच्याकडे देण्यात आली आहे.
