नवी दिल्ली । जगातील सर्वात श्रीमंत व्यक्ती असलेले एलन मस्क यांनी पुन्हा एकदा टेस्ला कंपनीचे शेअर्स विकले आहेत. गुरुवारी त्यांनी टेस्लाचे 9,34,091 शेअर्स 96.3 कोटी डॉलर्समध्ये विकले. यापूर्वी, मस्कने 4 नोव्हेंबर रोजी कंपनीच्या शेअर्सची विक्री सुरू केली होती आणि तेव्हापासून कंपनीचा शेअर 18 टक्क्यांनी घसरला आहे. गुरुवारी शेअर्सची विक्री केल्यानंतर, एलन मस्कची एकूण संपत्ती 16 अब्ज डॉलर्स किंवा सुमारे 1,20,959 कोटी रुपयांनी घसरली.
टेस्ला या जगातील सर्वात मौल्यवान ऑटो कंपनीचे शेअर्स गुरुवारी 6.1 टक्क्यांनी घसरले. Bloomberg Billionaires Index नुसार, एलन मस्कची एकूण संपत्ती आता 266 अब्ज डॉलर्स आहे. एलन मस्कने ट्विटरवर आपल्या फॉलोअर्सकडून कंपनीतील आपली हिस्सेदारी विकण्यासाठी मत मागितले होते. गुरुवारीच त्यांनी ट्विट करून जॉब सोडण्याविषयी म्हंटले होते.
मस्कना शेअर्स का विकावे लागत आहेत ?
मनीकंट्रोलच्या मते, एलन मस्क पगाराऐवजी टेस्लामध्ये Stock Options घेतात. अशा प्रकारे, त्यांना बाजारभावापेक्षा 90% कमी दराने टेस्लाचे शेअर्स खरेदी करण्याचा अधिकार मिळतो. 2012 मध्ये, टेस्लाने एलन मस्क यांना Stock Options दिले. या अंतर्गत मस्कना कंपनीचे सुमारे 2.28 कोटींचे शेअर्स फक्त 6.24 डॉलर प्रति शेअर या किमतीत खरेदी करण्याचा पर्याय मिळाला. या पर्यायाचा फायदा घेण्यासाठी मस्ककडे 2022 पर्यंत वेळ होता.
मात्र, यादरम्यान यूएसमध्ये एक कायदा आला, ज्याच्या अंतर्गत सर्व शेअर्सच्या एक्सरसाइज प्राइस (ज्या किंमतीला ते खरेदी केले गेले होते) आणि शेअर्सचे वास्तविक मूल्य यांच्यातील फरकावर 50% भांडवली नफा म्हणून टॅक्स भरावे लागेल. एलन मस्क आता हा स्टॉक ऑप्शन रिडीम करून कंपनीचे शेअर्स खरेदी करत आहे. मात्र, 50% कर दायित्व भरण्यासाठी त्यांना मोठ्या प्रमाणात शेअर्सची पुनर्विक्री करण्यास भाग पाडले जाते.