मुंबई । करोनाविरोधातील लढ्यात अहोरात्र कर्तव्य बजावणाऱ्या पोलीस दलाला कोरोनाने विळखा घातला आहे. राज्यात कोरोनाग्रस्तांच्या प्रमाणात वाढ होत असून यात पोलीस दलातील कर्मचाऱ्यांचा समावेश आहे. राज्यात मुंबई पोलीस दलात सर्वाधिक कर्मचारी कोरोनाबाधित आहेत. लॉकडाउन लागू झाल्यापासून राज्यातील पोलीस दलावर प्रचंड ताण आहे. पोलिसांवर सर्वसामान्यांच्या सुरक्षेच्या जबाबदारीसह करोनाला रोखण्याचं आव्हान असताना विषाणूचा घट्ट विळखा बसला आहे. गेल्या २४ तासांत राज्यातील ११४ पोलीस कर्मचारी करोनाबाधित असल्याचं स्पष्ट झालं आहे. तर एका पोलीस कर्मचाऱ्याचा या करोना विषाणूनं बळी घेतला आहे.
राज्यातील एकूण कोरोनाबाधित पोलीस कर्मचारी-अधिकाऱ्यांची संख्या आता २,३२५ वर पोहोचली आहे. तर आतापर्यंत २६ पोलिसांचा मृत्यू झाला आहे. मुंबईतील वांद्रे पोलीस ठाण्यातील एका पोलीस कर्मचाऱ्याचा काल, शुक्रवारी कोरोनामुळे मृत्यू झाला. मुंबई पोलीस दलातील मृत्यूची संख्या १६ झाली आहे. करोनामुक्त झालेल्या पोलिसांची एकूण संख्या ९७० एवढी आहे.
दरम्यान, राज्यात फक्त पोलिसांसाठी विशेष रुग्णालय उभारण्यासाठी आवश्यक कार्यवाही करण्यात येईल, असं गृहमंत्री अनिल देशमुख यांनी सांगितलं. करोनाविरोधात लढा देणाऱ्या राज्यातील पोलिसांना आरोग्याच्या चांगल्या सुविधा देण्याबाबत वरिष्ठ पातळीवर निर्देश दिले आहेत. पोलिसांसाठी विशेष रुग्णालय असावे ही सूचना योग्य वाटते. त्यादृष्टीने आगामी काळात प्रयत्न करण्यात येतील, असंही त्यांनी सांगितलं.
ब्रेकिंग बातम्या मोबाईलवर मिळवण्यासाठी आम्हाला 7972630753 या नंबरला WhatsApp करा आणि लिहा “Hello News.”