हॅलो महाराष्ट्र ऑनलाईन Mumbai Crime । मुंबईतून एक धक्कादायक घटना समोर आली आहे. एका अज्ञात पुरुषाने कामावरून घरी परतणाऱ्या २१ वर्षीय महिलेला भर रस्त्यात अडवलं. तिला मोबाईल मधील अश्लील व्हिडिओ दाखवला आणि नंतर तो घटनास्थळावरून पळून गेला.२ डिसेंबर रोजी रात्री ११:४५ वाजताच्या सुमारास हि घटना घडली. या घटनेनंतर सदर महिलेने तरुणाविरोधात पोलीस तक्रार दाखल केली आहे. मात्र या घटनेमुळे मुंबईतील महिलांच्या सुरक्षेचा प्रश्न पुन्हा एकदा ऐरणीवर आला आहे.
नेमकं काय घडलं? Mumbai Crime
ही घटना २ डिसेंबर रोजी रात्री ११:४५ वाजताच्या सुमारास हिंदू कॉलनी लेन क्रमांक २ येथील लखमशी नापू रोडच्या कोपऱ्यावर घडली. एफआयआरनुसार, दादर पूर्वेतील हिंदू कॉलनीची रहिवासी असलेली पीडित महिला मालाडमधील एका स्टुडिओमध्ये काम करते. घटनेच्या रात्री ती रात्री ११:४० वाजताच्या सुमारास मालाडहून लोकल ट्रेनने दादर रेल्वे स्टेशनवर आली. स्टेशनवरून घरी जात असताना, ती हिंदू कॉलनी लेन क्रमांक २ मधील लखमशी नापू रोडच्या कोपऱ्यावर पोहोचली तेव्हा, पाठीमागून एक अनोळखी माणूस तिच्याकडे आला आणि नंतर पुढे गेला. त्या माणसाने पीडितेला “दीदी”अशी हाक मारून थांबवले. ती थांबताच, तो तिच्या शेजारी उभा राहिला, त्याचा मोबाईल फोन बाहेर काढला आणि त्यावर चालू असलेला एक अश्लील व्हिडिओ त्या महिलेला दाखवला. यानंतर सदर महिला चांगलीच घाबरली. तिने तात्काळ आरडाओरडा करण्यास सुरुवात केली. महिलेचा आरडाओरडा पाहताच आरोपीने घटनास्थळावरून पोबारा केला. पीडितेने हल्लेखोराचा पाठलाग करण्याचा प्रयत्न केला पण तो अंधाराचा फायदा घेऊन पळून जाण्यात यशस्वी झाला. Mumbai Crime
घरी पोहोचल्यानंतर महिलेने तिच्या कुटुंबाला ही वेदनादायक घटना सांगितली. त्यानंतर, तिने माटुंगा पोलिस ठाण्यात तक्रार दाखल केली. माटुंगा पोलिसांनी भारतीय न्याय संहिता (BNS) कायद्याच्या कलम 75 (1)(iii) अंतर्गत गुन्हा दाखल केला आहे. पीडितेने दिलेल्या वर्णनाच्या आधारे, पोलिसांनी परिसरातील सीसीटीव्ही फुटेज वापरून आरोपीचा शोध सुरू केला आहे. परंतु या घटनेमुळे मुंबईत महिला सुरक्षित आहेत का? या प्रश्न पुन्हा एकदा उभा राहतोय.
