Paytm IPO – देशातील सर्वात मोठा IPO फ्लॉप ! दोन दिवसांत गुंतवणूकदारांचे झाले 6,690 कोटी रुपयांचे नुकसान, कुठे चूक झाली जाणून घ्या

नवी दिल्ली । Paytm ची मूळ कंपनी One97 Communications Ltd चे शेअर्स लिस्टिंगच्या दुसऱ्या दिवशीही घसरत राहिले. मात्र, मंगळवारी कंपनीच्या शेअरमध्ये थोडी खरेदी झाली. आज कंपनीचा शेअर बीएसईवर 1434 रुपयांवर ट्रेड करत आहे.

वॉल स्ट्रीट जनरलच्या रिपोर्ट्स नुसार, या दोन दिवसांत Paytm च्या IPO मध्ये गुंतवणूक करणाऱ्या गुंतवणूकदारांचे जवळपास $90 कोटी (6690 कोटी रुपये) बुडाले आहेत.

हा आतापर्यंतचा सर्वात मोठा IPO आहे
Paytm ने त्याच महिन्यात आपला IPO लॉन्च केला, जो भारतातील आतापर्यंतचा सर्वात मोठा IPO आहे. मात्र त्याची लिस्टिंग खूपच खराब होती. प्रचंड विक्रीच्या दबावामुळे, Paytm चे शेअर्स सोमवारी NSE वर 12.74 टक्क्यांनी घसरून 1,362.00 रुपयांवर बंद झाले. हे त्याच्या जारी किंमतीपेक्षा सुमारे 37% कमी होते.

मोबाइल पेमेंट ते आर्थिक सेवा पुरवणाऱ्या Paytm चे शेअर्स गेल्या आठवड्यात गुरुवारी शेअर बाजारात लिस्ट झाले. हा सुमारे 1800 कोटी रुपयांचा IPO होता, जो आजपर्यंतचा भारतातील सर्वात मोठा IPO आहे. Paytm च्या IPO ची अनेक दिवसांपासून प्रतीक्षा होती. या कंपनीच्या गुंतवणूकदारांमध्ये जपानी गुंतवणूक फर्म सॉफ्टबँक ग्रुप, वॉरेन बफेट यांची बार्कशायर हॅथवे आणि चीनी वित्तीय तंत्रज्ञान कंपनी अँट ग्रुप यांचा समावेश आहे.

कुठे चूक झाली जाणून घ्या
हाँगकाँगस्थित रिसर्च फर्म Aletheia Capital Ltd चे ​​सह-संस्थापक प्रशांत गोखले म्हणाले, “त्याची किंमत जास्त ठेवण्यात आली हे स्पष्ट आहे. चुकीची किंमत कशामुळे आली हे बाहेरून सांगणे कठीण आहे, मात्र असे दिसते की, कंपनीने सर्वात मोठा IPO लाँच करण्याच्या इच्छेने त्याचे मूल्यांकन जास्त केले आहे.”

“कंपनीच्या व्यवसायाची मूलभूत तत्त्वे कमकुवत आहेत, मात्र आदर्श परिस्थिती लक्षात घेऊन किंमत निश्चित करण्यात आली आहे,” असे ते म्हणाले. गोखले म्हणाले, “Paytm समोरील सर्वात मोठे आव्हान हे आहे की त्यांच्याकडे मोठा ग्राहकवर्ग आहे, मात्र पेमेंट करण्यासाठी कोणतेही शुल्क आकारले जात नसल्यामुळे त्यातून पैसे कसे कमवायचे याचा त्यांना विचार करावा लागेल. UPI क्रांतीमुळे हे आव्हान आणखी मोठे झाले आहे.”