सातारा प्रतिनिधी । शुभम बोडके
सातारा जिल्ह्यातील मौजे शिरगाव (ता. कराड) येथील पृथ्वीराज प्रशांत पाटील व प्रियांका प्रशांत पाटील या सख्ख्या बहिण-भावंडांची महाराष्ट्र शासनाच्या जलसंपदा विभागामध्ये सहाय्यक अभियंता म्हणून निवड झाली आहे. महाराष्ट्र लोकसेवा आयोगामार्फत २०२१ मध्ये घेण्यात आलेल्या महाराष्ट्र स्थापत्य अभियांत्रिकी सेवा परीक्षा यश मिळवले.
पृथ्वीराज व प्रियांका हे दोघे बहिण-भावंडे मिळून दररोज दहा तास अभ्यास करत होते. दोघांनीही घरीच राहून एकत्र अभ्यास करून जिद्द व चिकाटीने हे यश संपादन केले आहे. त्यांनी आपल्या यशाचे श्रेय आई- वडिलांना दिले आहे. अभ्यासातील सातत्य महत्त्वाचे आहे. परीक्षेची डिमांड ओळखून त्यानुसार जुन्या प्रश्नपत्रिकांचे विश्लेषण करून अशा प्रकारच्या प्रश्नांच्या सराव चाचणी दिल्या. अशी एकच चाचणी न देता भरपूर सराव प्रश्नपत्रिका सोडविल्या. आपल्या चुका कोणत्या आहेत, ते बघून पुढची परीक्षा देण्यापूर्वी त्या झालेल्या चुका पाहणे आणि टाईम मॅनेजमेंट करणे या गोष्टी कटाक्षाने पाळल्या. सराव चाचणी दिल्यानंतर चुकलेल्या प्रश्नांबाबत आम्ही बहिण-भावंडे दोघे चर्चा करायचो आणि त्यानुसार एकमेकांच्या चुका सुधारत गेलो. भावाला पहिल्या प्रयत्नात एका मार्काने अपयश आले होते; परंतु हार न मानता दुसऱ्या परीक्षेची तयारी करून यश संपादन केले.
पृथ्वीराज पाटील यांची MSEB मधील महापारेषण विभागात सहाय्यक अभियंता म्हणूनही निवड झाली आहे. दुसऱ्या प्रयत्नात सोबत बहिणही होती आणि भावाच्या मार्गदर्शनामुळे बहिणीला पहिल्याच प्रयत्नात यश मिळाले, असे पृथ्वीराज सांगतो. दररोज रात्री आम्ही दोघे आणि वडिल शतपावली करायला जायचो, त्यावेळी दिवसभर केलेल्या अभ्यासाची वडिलांसोबत चर्चा करायचो आणि वडिल आम्हाला मार्गदर्शन करायचे. आता वडिलांचे दोन्ही मुलांना शासकीय अधिकारी बनविण्याचे स्वप्न पूर्ण झाले आहे. वडिलांची आर्थिक परिस्थिती बेताची असताना शैक्षणिक कर्ज काढून त्यांनी दोन्ही मुलांना इंजिनीयर बनवले आहेत.
पृथ्वीराज व प्रियांका दोघांचे शालेय शिक्षण यशवंतराव चव्हाण विद्यालय, यशवंतनगर येथून झाले आहे. पृथ्वीराज यांनी व्ही.जे. टी.आय. मुंबईमधून सिव्हिल इंजिनिअरिंगमध्ये बी. टेक. डिग्री संपादित केली आहे तर प्रियांका यांनी शासकीय अभियांत्रिकी महाविद्यालय, कराड येथून सिव्हिल इंजिनिअरिंगमध्ये बी.टेक.डिग्री संपादित केली आहे.
या यशाबद्दल त्यांचे सर्व स्तरातून अभिनंदन होत आहे. दोघांनीही घरीच राहून एकत्र अभ्यास करून जिद्द व चिकाटीने हे यश संपादन केले आहे. त्यांना विद्यासागर अकॅडमीचे शिक्षक, कार्यकारी अभियंता श्री. ओंकार शेंडुरे (जलसंपदा विभाग) यांचे मार्गदर्शन लाभले. त्यांनी आपल्या यशाचे सारे श्रेय आई- वडिलांना दिले आहे. वडील प्रशांत पाटील हे सह्याद्री सहकारी साखर कारखान्यामध्ये नोकरीला आहेत. तर आई गृहिणी आहे.