मुंबई । रिलायन्स इंडस्ट्रीजच्या 44 व्या वार्षिक सर्वसाधारण सभेत अध्यक्ष मुकेश अंबानी यांनी रिलायन्स जिओ आणि गूगलच्या भागीदारीत बनविलेले नवे स्मार्टफोन जिओफोन-नेक्स्ट ची घोषणा केली. या नवीन स्मार्टफोनमध्ये जिओ आणि गूगलचे फीचर्स आणि अ‍ॅप्स असतील.
या अँड्रॉइड-आधारित स्मार्टफोनची ऑपरेटिंग सिस्टम जिओ आणि गूगल यांनी संयुक्तपणे विकसित केली आहे. मुकेश अंबानी यांनी जाहीर केले की, हा नवीन स्मार्टफोन सामान्य माणसाच्या खिशाला परवडेल असा बनविला गेला आहे. जो अत्यंत किफायतशीर असेल आणि 10 सप्टेंबरपासून अर्थात गणेश चतुर्थीपासून बाजारात उपलब्ध होईल.
जगातील सर्वात स्वस्त स्मार्टफोन
भारतीय बाजारपेठेसाठी खास तयार केलेल्या या जिओफोन-नेक्स्ट स्मार्टफोनवर युझर्स गुगल प्ले वरून अ‍ॅप्स डाउनलोड करू शकतात. या स्मार्टफोनमध्ये सर्वोत्कृष्ट कॅमेरा आणि अँड्रॉइड अपडेटसुद्धा मिळतील. मुकेश अंबानी यांनी या फुलली फीचर्ड स्मार्टफोनचे वर्णन केवळ भारतातच नव्हे तर जगातील सर्वात स्वस्त स्मार्टफोन असे म्हणून केले.
गूगलचे मुख्य कार्यकारी अधिकारी सुंदर पिचाई यांनी नवीन स्मार्टफोनबद्दल सांगितले
गेल्या वर्षीच रिलायन्स जिओने गुगलबरोबरील आपल्या भागीदारीची घोषणा केली होती. गुगलचे मुख्य कार्यकारी अधिकारी सुंदर पिचाई या नवीन स्मार्टफोनविषयी म्हणाले, “आमची पुढची पायरी गुगल आणि जिओच्या सहकार्याने नवीन, परवडणार्‍या जिओ स्मार्टफोनपासून सुरू होते. हे खास भारतासाठी तयार केले गेले आहे आणि लाखो नवीन युझर्ससाठी नवीन शक्यता उघडेल जे पहिल्यांदाच इंटरनेटचा अनुभव घेतील. गूगल क्लाऊड आणि जिओ यांच्यात नवीन 5G भागीदारी अब्जाहून अधिक भारतीयांना वेगवान इंटरनेटशी जोडण्यास मदत करेल आणि पुढच्या टप्प्यातील डिजिटायझेशनची पायाभरणी करेल. ”
अध्यक्ष मुकेश अंबानी म्हणाले, “आम्ही जागतिक भागीदारांसह 5G इकोसिस्टम विकसित करण्यासाठी आणि 5G उपकरणांची श्रेणी विकसित करण्यासाठी कार्यरत आहोत. जिओ केवळ भारताला 2G फ्री करण्यासाठीच नव्हे तर 5G सक्षम करण्याकरिताही काम करीत आहे.”
रिलायन्सचे अध्यक्ष मुकेश अंबानी म्हणाले की,”डेटा वापरण्याच्या बाबतीत रिलायन्स जिओ जगातील दुसरे नेटवर्क बनले आहे. रिलायन्स जिओच्या नेटवर्कवर दरमहा 630 कोटी जीबी डेटा वापरला जातो. गेल्या वर्षीच्या तुलनेत हे प्रमाण 45 टक्के जास्त आहे.”
जिओफोन-नेक्स्टच्या किंमती जाहीर केल्या नसल्या तरी तज्ञांचा असा विश्वास आहे की, त्याची किंमत खूपच कमी ठेवली जाईल. जिओ-गूगलचा अँड्रॉइड-आधारित स्मार्टफोन जिओफोन-नेक्स्ट गेम चेंजर असल्याचे सिद्ध होईल. हे 300 कोटी लोकांचे जीवनच बदलू शकेल ज्यांच्या हातात अद्याप 2G मोबाइल सेट आहेत. जिओ-गुगलचा हा नवीन स्मार्टफोन वेगवान गती, चांगली ऑपरेटिंग सिस्टम आणि परवडणार्‍या किंमतीच्या आधारे रिलायन्स जिओची बॅग कोट्यावधी नवीन ग्राहकांनी भरू शकेल.
राज्यातील सर्व महत्वाच्या ब्रेकिंग बातम्या थेट मोबाईलवर मिळवण्यासाठी आमचा WhatsApp ग्रुप Join करा