औरंगाबाद – महाराष्ट्र लोकसेवा आयोगाच्या वतीने राज्यसेवेची पूर्वपरीक्षा आज 23 जानेवारी रोजी होणार असून, 47 केंद्रांवर 15 हजार 234 उमेदवारांची आसनव्यवस्था करण्यात आली आहे. सकाळी 10 ते दुपारी 12 व दुपारी 3 ते संध्याकाळी 5 अशा दोन सत्रात ही परीक्षा होईल. परीक्षेसाठी 1 हजार 726 अधिकारी कर्मचाऱ्यांची नियुक्ती करण्यात आली आहे, असे सामान्य प्रशासनाचे उपजिल्हाधिकारी प्रभोदय मुळे यांनी कळवले आहे.
या परीक्षेत दोन्ही सत्रांमध्ये वस्तुनिष्ठ बहुपर्यायी प्रश्नपत्रिका असेल. परीक्षा कक्षात उमेदवाराने प्रवेश प्रमाणपत्र स्वतःच्या ओळखीच्या पुराव्यासाठी स्वतःचे आधार कार्ड, निवडणूक आयोगाचे ओळखपत्र, पासपोर्ट, पॅनकार्ड किंवा स्मार्ट कार्ड वाहन चालवण्याचा परवाना यापैकी एक ओळखपत्र सोबत बाळगणे अनिवार्य आहे. प्रवेश प्रमाणपत्र काळ्या व निळ्या शाईचे बॉलपॉइंट पेन, ओळखपत्र, सॅनिटायझर, पारदर्शक पाणी बाटली या व्यतिरिक्त अन्य साहित्य वस्तू परीक्षा कक्षामध्ये घेऊन जाण्यास परवानगी नाही.
उमेदवारांना परीक्षा कक्षात मोबाईल, डिजिटल डायरी, मायक्रोफोन, ब्लूटूथ, कॅमेरा फोन किंवा तत्सम कोणतेही संदेशवहन उपकरण, इलेक्ट्रॉनिक साहित्य घेऊन जाण्यास मनाई आहे. असे साहित्य आणले तर उमेदवारांना स्वतःच्या जबाबदारीवर परीक्षा केंद्राच्या आवारात मुख्य दरवाजाबाहेरच ठेवावे लागेल.