न्यूयॉर्क । जगभरात, कोरोनाव्हायरसच्या Omicron व्हेरिएन्टचा संसर्ग रोखण्यासाठी आणि प्रतिकारशक्ती वाढवण्यासाठी अनेक संशोधन केले जात आहेत. काही शास्त्रज्ञ ओमिक्रॉन विरूद्ध प्रभावी ठरेल अशी एक नवीन लस तयार करण्याचा सल्ला देत आहेत. मात्र, अमेरिकेतील माकडांवर केलेल्या नवीन संशोधनातून असे सूचित झाले आहे की, सध्याचा बूस्टर डोस या व्हेरिएन्टसाठी पुरेसा आहे. यासाठी नवीन लस तयार करण्याची गरज नाही.
हे संशोधन अमेरिकेच्या नॅशनल इन्स्टिट्यूट ऑफ ऍलर्जी अँड इन्फेक्शियस डिसीजच्या शास्त्रज्ञांनी केले आहे. यामध्ये अशा काही माकडांचा समावेश होता, ज्यांना मॉडर्ना लसीचे दोन्ही डोस मिळाले होते. यासाठी माकडांची दोन गटात विभागणी झाली. 9 महिन्यांनंतर, पहिल्या गटाला मॉडर्ना लसीचा समान बूस्टर डोस देण्यात आला, तर दुसऱ्या गटाला ओमिक्रॉनला टार्गेट करणारी विशेष लस देण्यात आली.
दोन्ही प्रकारच्या लस Omicron विरुद्ध प्रभावी आहेत
शास्त्रज्ञांना आढळले की, माकडांमधील दोन्ही प्रकारच्या लसींनी कोरोनाच्या सर्व व्हेरिएन्टविरूद्ध समान प्रतिकारशक्ती विकसित केली आहे. या अभ्यासात सहभागी असलेले शास्त्रज्ञ डॅनियल ड्यूक म्हणाले,”ही खूप चांगली बातमी आहे. त्यांच्या मते, हे संशोधन सिद्ध करते की आपल्याला ओमिक्रॉनसाठी वेगळी लस बनवण्याची गरज नाही.”
प्रोफेसर जॉन मूर म्हणतात की,”माकडांवर असे संशोधन करण्याचा खूप मोठा फायदा आहे. याद्वारे आपण माकडांना लसीकरण करू शकतो, त्यांची प्रतिकारशक्ती वाढवू शकतो, त्यांना व्हायरसने पुन्हा संक्रमित करू शकतो आणि त्यांची प्रतिकारशक्ती पुन्हा एकदा तपासू शकतो.” मूर यांच्या मते, या संशोधनानंतरही आपण मानवांच्या डेटाची वाट पाहिली पाहिजे. मात्र हे लक्षात घ्या की, मूर या संशोधनाचा भाग नव्हते.