औरंगाबाद – शहरातील गारखेडा परिसरातील एका प्रसिद्ध हॉस्पिटल मध्ये काम करत असताना डॉक्टरने परिचारिकेवर अत्याचार केला. तिला दिवस गेल्यानंतर डॉक्टरने गर्भपाताच्या गोळ्या देऊन गर्भपात केला. त्या डॉक्टरच्या तीन मित्रांनी तिचा विनयभंग केला. या धक्कादायक प्रकरणी दामिनी पथकाने केलेल्या मदतीनं तर मुकुंदवाडी पोलिस ठाण्यात गुन्हा नोंदविण्यात आल्याचे निरीक्षक ब्रम्हागिरी यांनी सांगितले.
या प्रकरणातील आरोपी मध्ये डॉ. प्रसाद संजय देशमुख, रेस्टॉरंटचा मालक दीपक पाटील, मेडिकल दुकानदार सचिन शिंदे यांच्यासह आणखी एकाचा समावेश आहे. देशमुख ने तिच्याशी मैत्री करून अनेकदा बलात्कार केला. ती गरोदर राहिली डॉक्टरने तिला गोळ्या देऊन गर्भपात केला. यात पीडितेला प्रचंड वेदना झाल्या. त्यामुळे ती पुन्हा डॉक्टरांकडे गेली त्याने तिला मुकुंदवाडी भागातील नातेवाईकाच्या हॉटेलमध्ये घेऊन त्या परिस्थितीतही बलात्कार केला. त्याचा मावसभाऊ दीपक पाटीलने पीडितेवर जबरदस्तीचा प्रयत्न केला. त्याच्या तावडीतून सुटका करून ती सिडको बस स्थानकात जाऊन बसली.
पीडिता सिडको बसस्थानकात बसल्यावर तिला वेदना असह्य होत असल्यामुळे तेथील सुरक्षा रक्षकाने दामिनी पथकाला फोनवर कळविले. दामिनी पथकाच्या प्रमुख उपनिरीक्षक सुवर्णा उमाप, हवालदार लता जाधव, निर्मला निंभोरे, मनीषा बनसोडे, गिरीजा आंधळे यांच्या पथकाने येऊन पीडितेची विचारपूस करत तिला मुकुंदवाडी पोलिस ठाण्यात घेऊन गेले.