अमेरिकन प्राणिसंग्रहालयात दोन तरसांना कोरोनाची लागण, प्राण्यांमध्ये संसर्गाची ही जगातील पहिलीच घटना

डेन्व्हर । अमेरिकेतील डेन्व्हरमधून कोरोना विषाणूचे एक मोठे प्रकरण समोर आले आहे. येथे डेन्व्हर प्राणीसंग्रहालयात, 11 सिंह आणि दोन तरसांना ज्यांना आपण हायना म्हणून ओळखतो ते कोरोना विषाणू पॉझिटिव्ह आढळले आहेत. अमेरिकेच्या नॅशनल वेटरनरी सर्विसेज लॅबोरेटरीजने (United States Lab) याची पुष्टी केली आहे. डेन्व्हर प्राणीसंग्रहालयातील दोन तरस कोरोना पॉझिटिव्ह असल्याचे लॅबोरेटरीजने म्हंटले आहे. कोविड-19 ची लागण झालेली जगातील तरसांची ही पहिलीच घटना आहे.

याविषयी माहिती देताना, नॅशनल वेटरनरी सर्विसेज लॅबोरेटरीज (NVSL) ने सांगितले की,” प्राणीसंग्रहालयातील अनेक सिंह आजारी पडल्यानंतर, ठिपकेदार तरसांसह अनेक प्राण्यांचे नमुने चाचणीसाठी घेण्यात आले. या तरसांच्या नमुन्यांची कोलोरॅडो स्टेट युनिव्हर्सिटीच्या प्रयोगशाळेत चाचणी करण्यात आली जिथे ते कोरोना पॉझिटिव्ह आढळले. तरसांशिवाय 11 सिंह आणि दोन वाघांनाही या विषाणूची लागण झाल्याचे आढळून आले आहे. एकाच वेळी एवढ्या मोठ्या जनावरांना कोरोनाची लागण झाल्याचे आढळल्याने प्रशासनात खळबळ उडाली आहे.

रिपोर्ट्स नुसार, प्राणीसंग्रहालयात अनेक प्राणी आजारी आढळले होते, त्यानंतर सर्वांचे नमुने घेण्यात आले. प्राणिसंग्रहालयाच्या प्रशासनाने सांगितले की,”कोरोना पॉझिटिव्ह तरस सध्या पूर्णपणे निरोगी असून त्यामध्ये कोणत्याही प्रकारची समस्या नाही.” प्रशासनाने पुढे म्हटले आहे की, तरस हे कुख्यातपणे कठोर, लवचिक प्राणी आहेत जे अँथ्रॅक्स, रेबीज आणि डिस्टेम्परला अत्यंत सहनशील म्हणून ओळखले जातात.”

प्राणिसंग्रहालयाच्या अधिकाऱ्यांनी सांगितले की,”दोन्ही कोरोना संक्रमित तरसांमध्ये कोरोनाची सौम्य लक्षणे जाणवत आहेत. त्यापैकी एक 22 वर्षांचा तर दुसरा 23 वर्षांचा आहे. दोघांमध्ये थोडीशी सुस्ती तर कधी खोकल्याची समस्याही दिसून येत आहे.” प्रशासनाच्या म्हणण्यानुसार, गेल्या काही आठवड्यांमध्ये कोविड पॉझिटिव्ह आढळलेले प्राणी पूर्णपणे बरे झाले आहेत किंवा लवकर बरे होत आहेत.

प्राणिसंग्रहालय प्रशासनाने सांगितले की,”प्राण्यांच्या अनेक प्रजाती आहेत ज्या अतिसंवेदनशील आहेत. अशा प्राण्यांना संसर्ग होण्याचा धोका जास्त असतो. अधिकाऱ्यांनी सांगितले की,”आम्ही आमच्या सर्व 3000 प्राणी आणि 450 हून अधिक प्रकारच्या प्रजातींची देखभाल आणि काळजी घेत असताना आवश्यक ती खबरदारी घेतो.”

You might also like