नवी दिल्ली । देशात एक बनावट क्रिप्टोकरन्सी घोटाळा समोर आला आहे. नवीन क्रिप्टोकरन्सीच्या नावावर सुमारे 900 लोकांकडून 1200 कोटी रुपयांची फसवणूक करण्यात आली आहे. ED ने याबाबत खुलासा केला आहे. या घोटाळ्याच्या संदर्भात अंमलबजावणी संचालनालयाने (ED) देशात अनेक ठिकाणी छापे टाकले आहेत. देशातून पळून गेलेली केरळमधील एक व्यक्ती त्याचा मास्टरमाईंड असल्याचे मानले जाते. त्याच्यावर मनी लाँड्रिंगचे गुन्हेही सुरू आहेत.
ED ने एका दक्षिनात्य चित्रपट अभिनेत्याच्या घरावरही छापे टाकले आहेत. मात्र, अभिनेत्याने या छाप्यांचा क्रिप्टोकरन्सी घोटाळ्याशी कोणताही संबंध नाकारला आहे. इनिशियल कॉईन ऑफरिंग (IOC) च्या नावाखाली घोटाळेबाजांनी हा घोटाळा केला आहे. 2020 मध्ये लॉकडाऊन दरम्यान फसवणूक झालेल्यांपैकी बहुतेक लोकांनी “Morris Coin” हे फेक कॉइन विकत घेतले होते.
अशा प्रकारे झाला घोटाळा
ED च्या सूत्रांच्या हवाल्याने इंडियन एक्स्प्रेस या इंग्रजी वृत्तपत्रात प्रसिद्ध झालेल्या वृत्तानुसार, बनावट क्रिप्टोकरन्सी “Morris Coin” 2020 मध्ये कोईम्बतूर-बेस्ड क्रिप्टोकरन्सी एक्सचेंज Franc Exchange सह लिस्ट करण्यात आली होती. IPO प्रमाणेच ते लोकांसमोर सादर केले गेले. 10 मॉरिस कॉईन्सची किंमत 15,000 रुपये ठेवण्यात आली होती आणि त्याचा लॉक-इन पिरियड 300 दिवसांचा होता. गुंतवणूकदाराला एक ई-वॉलेटही देण्यात आले. या बनावट क्रिप्टोकरन्सीच्या प्रमोटर्सने गुंतवणूकदारांना ती लवकरच महाग होणार असल्याचे आमिष दाखवले आहे.
सुरुवातीला Long Rich Technologies, Long Rich Trading आणि Long Rich Global सारख्या कंपन्यांनी सुरुवातीला ऑनलाइन एज्युकेशन अ‍ॅप असल्याचे सांगून गुंतवणूकदारांना आकर्षित केले. त्याने नंतर “Morris Coin” ची स्वतःची क्रिप्टोकरन्सी म्हणून ओळख करून दिली आणि दावा केला की ते क्रिप्टोकरन्सी एक्सचेंजमध्ये लिस्ट आहे. याशिवाय त्याने काही जलद पैसे दुप्पट करण्याच्या योजनाही राबवल्या आणि गुंतवणूकदारांकडून पैसे घेतले.
रिअल इस्टेट आणि इतर कामात पैसे गुंतवले
ED च्या सूत्रांचे म्हणणे आहे की,”या घोटाळेबाजांनी गुंतवणूकदारांकडून घेतलेल्या पैशातून रिअल इस्टेटमध्ये बेकायदेशीरपणे गुंतवणूक केली. केरळ, तामिळनाडू आणि कर्नाटकमध्ये सर्वाधिक गुंतवणूक करण्यात आली आहे. गुंतवलेल्या रकमेचा स्रोत त्यांनी उघड केला नाही. ED गेल्या अनेक दिवसांपासून केरळ, तामिळनाडू आणि दिल्लीत छापामार कारवाई करत आहे. छापे टाकण्यात आलेल्यांमध्ये बेंगळुरूस्थित लाँग रिच टेक्नॉलॉजीज आणि मॉरिस ट्रेडिंग सोल्युशन्सचा समावेश आहे.
मल्याळम अभिनेत्याच्या कंपनीवरही छापा टाकला
अंमलबजावणी संचालनालय Unni Mukundan Films Pvt. Ltd वरही छापा टाकला आहे. ही फर्म मल्याळम अभिनेते उन्नी मुकुनंदन आणि Nextel Group यांच्या मालकीची आहे. मुकुनंदन यांनी मात्र बनावट क्रिप्टोकरन्सी घोटाळ्याशी कोणताही संबंध असल्याचा इन्कार केला. मुकुनंदन म्हणाले की,”ED ने त्यांच्या उपक्रमांमध्ये गुंतवलेल्या फंडस् च्या स्रोताबाबत चौकशी केली आहे.”
31 वर्षांचा तरुण आहे किंगपिन
या संपूर्ण घोटाळ्याचा सूत्रधार म्हणून ED ने केरळच्या मल्लापुरम जिल्ह्यातील रहिवासी असलेल्या निषाद नावाच्या तरुणाचे वर्णन केले आहे.” अभिनेता मुकुनंदनचे निषादसोबत संबंध असल्याचे ED च्या अधिकाऱ्यांचे म्हणणे आहे. मात्र, त्यांनी नात्याचे स्वरूप सांगण्यास नकार दिला. गेल्या वर्षी पोलिसांनी निषादविरुद्ध कन्नूर आणि मल्लापूरमध्ये चिटफंड योजना चालवल्याप्रकरणी गुन्हा दाखल केला होता. त्यानंतर ED ने या प्रकरणाचा तपास सुरू केला. निषादला पोलिसांनी अटक केली, मात्र जामिनावर सुटल्यानंतर तो देश सोडून गेला.