औरंगाबाद – जिल्ह्यातील पैठण जवळील बालानगरातील 27 वर्षीय युवकावर कुर्‍हाडीने वार करून त्याचा निर्घुण खून केल्याची घटना काल रात्रीच्या सुमारास उघडकीस आली. संतोष भानुदास गल्हाटे (27) असे मृताचे नाव आहे. विशेष म्हणजे खून करणाऱ्या आरोपीने स्वतः पोलिस ठाण्यात हजर होऊन गुन्ह्याची कबुली दिली.
बालानगर येथील दारू दुकानाच्या समोरील मैदानावर काल रात्री गावातील संतोष गल्हाटे व भावकीतील दिनेश गल्हाटे यांच्यात पूर्वी झालेल्या भांडणातून वाद सुरू झाले. या वादाचे रूपांतर हाणामारीत होऊन दिनेश गल्हाटेने संतोषच्या डोक्यात, हातावर कुऱ्हाडीने घाव घालून त्याला ठार करत एमआयडीसी पोलीस ठाणे गाठले. मी संतोषला कायमचा खल्लास केला आहे असे त्याने सांगितल्यावर पोलिसांनी धक्काच बसला. पोलिसांनी विचारपूस करून सर्व घटना त्याच्याकडून समजून घेतली.
दिनेशने खुनाची कबुली दिल्यानंतर सहाय्यक पोलीस निरीक्षक भागवत नागरगोजे यांनी उपविभागीय अधिकारी विशाल नेहुल यांना घटनेची माहिती दिली. नागरगोजे यांनी पोलीस उपनिरीक्षक दिलीप चौरे, पोलीस उपनिरीक्षक राहुल भदर्गे, नामदेव कातडे, गणेश खंडागळे, कर्तारसिंग सिंघल, दिनेश दाभाडे यांच्या पथकासह घटनास्थळी धाव घेतली. पंचनामा करून उत्तरीय तपासणीसाठी मृतदेह पैठण येथील शासकीय रुग्णालयात पाठविला आहे. याप्रकरणी पुढील तपास एमआयडीसी पैठण पोलिस करत आहेत.