नवी दिल्ली । अफगाणिस्तानात तालिबान्यांचा कहर कायम आहे. दरम्यान, कंदहारमध्ये काही दिवसांपासून तालिबानला कव्हर करणार्‍या भारतीय छायाचित्रकार दानिश सिद्दीकीची हत्या करण्यात आली आहे. पुलित्झर पुरस्काराने सन्मानित केलेला दानिश सिद्दीकी वृत्तसंस्था रॉयटर्समध्ये काम करत असे. रॉयटर्सच्या माहितीनुसार, दानिश शुक्रवारी तालिबानी लढाऊ सैनिक आणि अफगाण सैन्य यांच्यातील युद्धाची माहिती देत होता. यावेळी त्याची हत्या करण्यात आली. दानिश सिद्दीकीच्या निधनाबद्दल रॉयटर्सने शोक व्यक्त केला.
जामिया येथून मास कम्युनिकेशनचा अभ्यास केला
दानिश सिद्दीकी मूळचा मुंबईचा. त्याच्या वडिलांचे नाव अख्तर सिद्दीकी आहे. त्याचे सुरुवातीचे शिक्षण मुंबईतच झाले. त्यानंतर तो पत्रकारितेचा अभ्यास करण्यासाठी दिल्लीला गेला. जामिया मिलिया इस्लामिया येथून त्यांने अर्थशास्त्र विषयात पदवी संपादन केली. 2007 मध्ये दानिशने जामिया मधील AJK मास कम्युनिकेशन रिसर्च सेंटर (Jamia Millia Islamia AJK MCRC) मधून मास कम्युनिकेशनची पदवी घेतली.
2010 मध्ये रॉयटर्समध्ये सामील झाला
दानिश सिद्दीकीने आपल्या कारकिर्दीची सुरूवात टीव्हीद्वारे केली. 2010 मध्ये तो रॉयटर्समध्ये दाखल झाला. या आठवड्यात जेव्हा तालिबान्यांनी कंदहार येथे स्पिन बोल्डक ताब्यात घेतले तेव्हा अफगाण स्पेशल फोर्सेसबरोबर त्यांच्या चकमकी सुरू झाल्या. दानिश याच चकमकी कव्हर करत होते.
युद्ध कव्हर करण्याचा चांगला अनुभव होता
दानिश सिद्दीकी, रॉयटर्समध्ये सामील झाल्यानंतर, 2016-17 मधील मोसूलची लढाई, एप्रिल 2015 मधील नेपाळ भूकंप, रोहिंग्या नरसंहारामुळे निर्माण झालेले निर्वासित संकट, 2019-2020 मध्ये हाँगकाँगचा विरोध, 2020 मधील कोरोना साथीला कव्हर केले होते. सहकारी अदनान अबीदी याच्यासह रोहिंग्या निर्वासित संकटाच्या असाधारण कव्हरेजसाठी त्यांना 2018 मध्ये, रॉयटर्सच्या फोटोग्राफी स्टाफचा भाग म्हणून पुलित्झर पुरस्कार देण्यात आला. फीचर फोटोग्राफीचा पुलित्झर पुरस्कार जिंकणारा दानिश पहिला भारतीय होता.
दानिश भारतात रॉयटर्सच्या पिक्चर्स टीमचे प्रमुख होता
दानिश हा भारतातील रॉयटर्स पिक्चर्स टीमचे प्रमुखही होता. 2020 च्या दिल्ली दंगलीच्या वेळी त्याने क्लिक केलेल्या फोटोचे नाव रॉयटर्सने 2020 मधील सर्वात प्रभावशाली फोटोंपैकी एक म्हणून गौरविले होते.
रॉयटर्सने व्यक्त केले दुःख
रॉयटर्सचे अध्यक्ष मायकल फ्रिडेनबर्ग आणि मुख्य संपादक एलेसॅन्ड्रा गॅलोनी यांनी दानिश सिद्दीकीच्या हत्येबद्दल शोक व्यक्त केला. “दानिश सिद्दीकी एक उत्कृष्ट पत्रकार, एक निष्ठावंत पती, वडील आणि खूप प्रिय सहकारी होता. या भीषण घटनेच्या वेळी त्यांच्या कुटुंबियांबद्दल आम्ही संवेदना व्यक्त करतो,” असे रॉयटर्सने एका निवेदनात म्हटले आहे.
राज्यातील सर्व महत्वाच्या ब्रेकिंग बातम्या थेट मोबाईलवर मिळवण्यासाठी आमचा WhatsApp ग्रुप Join करा