नवी दिल्ली । भारत आणि दक्षिण आफ्रिका यांच्यातील 3 सामन्यांच्या मालिकेतील पहिला सामना सेंच्युरियनच्या सुपरस्पोर्ट पार्कवर खेळवला जात आहे. जिथे भारताने नाणेफेक जिंकून पहिल्या फलंदाजीचा निर्णय घेतला. सामन्याच्या पहिल्याच दिवशी दक्षिण आफ्रिकेचे खेळाडू काळी पट्टी बांधून मैदानात उतरताना दिसले. दक्षिण आफ्रिकेचे ‘आर्कबिशप’ डेसमंड टुटू यांचे रविवारी निधन झाले. ते 90 वर्षांचे होते आणि त्यांनी आयुष्यभर वर्णभेदाविरुद्ध लढा दिला.
त्यांना दक्षिण आफ्रिकेत वर्णभेद विरोधी प्रतीक म्हणूनही ओळखले जाते. टुटू यांना 1984 मध्ये शांततेचा नोबेल पुरस्कार मिळाला होता. त्यांच्या सन्मानार्थ दक्षिण आफ्रिकेचा संघ पहिल्या दिवशी काळी पट्टी बांधून मैदानात उतरला. 1990 च्या दशकाच्या उत्तरार्धात टुटू यांना प्रोस्टेट कर्करोगाचे निदान झाले होते, ज्यामुळे ते अनेक वर्षांपासून रुग्णालयात दाखल होते.
विहारी आणि अय्यर यांना वाट पाहावी लागेल
या सामन्याविषयी बोलायचे तर भारतीय कसोटी कर्णधार विराट कोहलीने नाणेफेक नंतर कबूल केले की, विरोधी संघ सर्वात मजबूत संघांपैकी एक आहे आणि दक्षिण आफ्रिका क्रिकेट खेळण्यासाठी आव्हानात्मक जागा आहे. अनुभवी चेतेश्वर पुजारा आणि अजिंक्य रहाणे यांनी प्लेइंग इलेव्हनमध्ये स्थान मिळवले. मात्र, यामुळे श्रेयस अय्यर आणि हनुमा विहारी यांना वाट पाहावी लागणार आहे.
त्याचवेळी दक्षिण आफ्रिकेच्या संघाकडून पहिलाच कसोटी सामना खेळत असलेला डावखुरा वेगवान गोलंदाज मार्को जॅनसेनची उंची 6 फूट 8 इंच आहे. या वर्षी त्याने IPL मध्येही पदार्पण केले. रोहित शर्माच्या नेतृत्वाखालील मुंबई इंडियन्सने त्याला 20 लाख रुपयांच्या बेस प्राईसमध्ये खरेदी केले.