महादेव जानकरांची मोठी घोषणा; ‘या’ मतदारसंघातून लढवणार लोकसभा

हॅलो महाराष्ट्र ऑनलाईन । आगामी लोकसभा निवडणुकीच्या दृष्टीने अनेकांकडून प्रयत्न केले जात आहेत. दरम्यान महाराष्ट्रातून कोण कोण निवडणुका लढवणार हे निश्चित झालेले नाही. अशात आता ओबीसी समाजाच्या प्रश्नांवर आवाज उठवणारे माजी मंत्री महादेव जानकर यांनी मोठी घोषणा केली आहे. आपण आगामी लोकसभा निवडणूक परभणी जिल्ह्यातून लढणार असल्याचे जाणकाराने म्हंटले आहे.

माजी मंत्री महादेव जानकर यांच्याकडून नांदेड जिल्ह्याचा दौरा केला जात आहे. या दौऱ्यावेळी त्यांनी माध्यमांशी संवाद साधला. यावेळी ते म्हणाले की, देशभरात राष्ट्रीय समाज पक्षाचा विस्तार करण्याचा प्रयत्न केला जात आहे. आम्ही आगामी येणाऱ्या सर्व निवडणुका देखील लढवणार आहोत. म्हाडा, परभणी, सांगली अशा ठिकाणी ज्या ज्या निवडणूक होतील त्या मोठ्या ताकदीने लढवणार आहोत.

मी परभणी मतदारसंघातून लोकसभेची निवडणूक लढवावी, अशी मागणी परभणी येथील राष्ट्रीय समाज पक्षाच्या कार्यकर्त्यांकडून केली जात आहे. मराठवाडा ही भूमी आमच्यासाठी फर्टाईल लँड आहे. प्रत्येक जिल्ह्यात आपल्या पक्षाचे खाते कशा प्रकारे उघडता येऊ शकेल. या दृष्टीने आमचा प्रयत्न सुरु आहे. संघटना कशी वाढेल यावरही आमचा प्रयत्न सुरु आहे.

सध्या पक्ष वाढीसाठी महाराष्ट्र तसेच इतर राज्यातही आमच्याकडून दौरे केले जात आहेत. मी स्वत: परभणीमधून स्वत:च्या पक्षाच्या चिन्हावर लोकसभा निवडणूक लढवणार आहे. परभणी लोकसभेची निवडणूक लढवू आणि विजयदेखील मिळवू अशी आम्हाला खात्री आहे, असे जानकर यांनी यावेळी सांगितले.