पुणे | पुण्यातील जनता वसाहतजवळून जाणारा मुळा कालवा गुरूवारी दुपारी फुटला असून यामुळे दांडेकर पुलावर पाणी आले आहे. यामुळे दुचाकी आणि चारचाकी गाड्यांचे नुकसान झाले असून लाखो लिटर पाणी वाया गेले आहे. यामुळे सिंहगड रस्त्यावरील वाहतूक खोळंबली आहे.

जनता वसाहतीजवळ मुळा कालव्याची भिंत कोसळली. यामुळे कालव्यातील पाणी परिसरात शिरले आणि अवघ्या काही वेळात परिसर जलमय झाला. यामुळे स्थानिकांमध्ये भीतीचे वातावरण पसरले होते. दांडेकर पुलावर पाणी आले असून यामुळे वाहनांचे नुकसान झाले आहे. कालव्यालगत राहणाऱ्या लोकांना सुरक्षित स्थळी हलवण्याचे काम सुरू झाले आहे.

खडकवासला धरणातून कालव्यात होणारा विसर्ग थांबवण्यात आला असून नागरिकांनी घाबरु नये, असे आवाहन महापौरांनी केले आहे. या घटनेमुळे लाखो लिटर पाणी वाया गेले असून कालव्याच्या कामाच्या दर्जाबाबत प्रश्न उपस्थित झाले आहे. दांडेकर पुलाकडे जाणारे सर्व रस्ते बंद करण्यात आले असून पुणे महापालिका, अग्निशमन दल आणि जलसंपदा विभागाचे पथक घटनास्थळी पोहोचले आहे.

पुणे | भौतिक जगातील अवकाश हा वास्तूरचनाकाराला काही सुचवत असतो. या अवकाशात वास्तूरूपात बांधून काढलेला अवकाश व रिकामा अवकाश यांचे एकमेकांशी असणारे नाते समजावून घेत त्याचा उत्सवच साजरा करायचा असतो. शेवटी हे जग माणसाबरोबर पशू-पक्षी, कीटक, व वनस्पतींसाठी आहे याचे भान ठेवायला हवे, असे प्रतिपादन बांगला देशातील प्रसिद्ध महिला आर्किटेक्ट मरिना तबस्सूम यांनी मांडले. निमित्त होते ते महर्षी कर्वे स्त्रीशिक्षण संस्थेच्या डॉ. भानूबेन नानावटी कॉलेज ऑफ आर्किटेक्चर (बीएनसीए) आणि रोहन बिल्डर्स यांच्या सहकार्यातून अद्वैत बडवे स्मृती व्याख्यानाचे व द ड्रॅाईंग बोर्ड स्पर्धेचे.

महर्षी स्त्रीशिक्षण संस्थेच्या डॉ. भानूबेन नानावटी कॉलेज ऑफ आर्किटेक्चर फॉर वूमेन (बीएनसीए) मधील आर्किटेक्ट अद्वैत बडवे स्मृती व्याख्यानमालेतील १७ वे पुष्प त्यांनी गुंफले. यावेळी बडवे कुटुंबियांपैकी प्रसिद्ध वास्तूरचनाकार व्ही.व्ही.बडवे,त्यांच्या पत्नी वृंदा बडवे आणि सत्यजीत बडवे बीएनसीएचे प्राचार्य डॉ. अनुराग कश्यप, शिक्षण विभाग प्रमुख डॉ. शुभदा कमलापूरकर इत्यादी मान्यवर उपस्थित होते.

एखाद्या प्रकल्पाचा आराखडा तयार करताना मानसिक पातळीवर आपल्याला मला काय वाटते तसेच तेथे वावरताना आपल्या मनात काय विचार येतील याचे भान आपण त्याचा आराखडा तयार करताना ठेवत असतो, असा अनुभव प्रतिष्ठेचा आगाखान पुरस्कार विजेत्या तबस्सूम यांनी सांगितला. बांगला देशातील ढाका येथील स्वातंत्र्य स्मृतीस्तंभ, मशिद आणि पर्यटकांसाठी निवासाच्या त्यांनी केलेल्या प्रकल्पांचे दाखले त्यांनी दिले.

बांगला देश विद्यापीठातून आर्किटेक्चरची पदवी घेतलेल्या तबस्सूम म्हणाल्या की, बांगला देशातील जीवनशैली व लोकजीवन, निसर्ग यांचा विचार वास्तूरचनेत करावा लागतो. ढाका येथील प्रतिष्ठेच्या स्वातंत्र्य स्मारकाच्या कामात आपण मानवी भावभावनांचा विचार वास्तूरूपात मांडला. त्यानुसार पृष्ठभागावर उत्तुंग व प्रकाशमान स्तंभ तुमच्या आनंद, आकांक्षाचे प्रतिक, तर जमिनीखाली दु:खद पण प्रेरणादायी इतिहास दाखवणार्‍या संग्रहालयाची भावस्थिती निर्माण करण्याचा प्रयत्न केला. त्यात नैसर्गिक प्रकाश व अवकाश यांचा समतोल राहील, हा प्रयत्नही केला. तीच गोष्ट इतर निवासी प्रकल्पांमध्ये केली. आपल्या प्रत्येक प्रकल्पात तिथे वावरणारे मानवी मन त्या अवकाशात जास्तीत जास्त कसे गुंतेल हाच आपण कटाक्ष ठेवला, असे तबस्सूम यांनी स्पष्ट केले.

यावेळी स्पर्धेचे परिक्षक व बंगलोर येथील आर्किटेक्ट पी. एन. मेडप्पा आणि आर्किटेक्ट सुमित्रो घोष यांनीही आपल्या प्रकल्पांचे सादरीकरण केले. सुरूवातीला डॉ. कमलापूरकर यांनी 25 व्या वर्षात पदार्पण करणार्‍या बीएनसीएच्या वाटचालीची माहिती दिली. त्यांनी रोहन बिल्डर्स व माईंड स्पेस संस्थेचे संजय मोहे यांनी विद्यार्थ्यांमधील संवेदनशीलतेला आवाहन करणार्‍या द ड्रॅाईंग बोर्ड स्पर्धेमागच्या संकल्पनेचे स्वागत केले. व्ही.व्ही.बडवे यांनी सादरीकरण करणार्‍या वक्त्यांचे स्वागत केले. रोहन बिल्डर्सचे अध्यक्ष व कार्यकारी संचालक सुहास लुंकड म्हणाले की. प्रत्येक बांधकामाच्या रचनेतून आपण समाज घडवत असतो. त्यामुळे ही महत्वाची जबाबदारी पर्यायाने वास्तूरचनाकारांवर येत असते. आर्किटेक्चरच्या विद्यार्थ्यांमधून ही जाणीव भविष्यात अधिक प्रगल्भतेने व्यक्त व्हावी असा आमचा हेतू आहे.

या कार्यक्रमाचे आयोजन समन्वयक प्रा.प्राजक्ता कुलकर्णी, प्रा.अमृता बर्वे तसेच प्रा.महेश बांगड यांनी केले होते. विप्रा कोठारी यांनी सूत्रसंचालन केले, तर अभिषेक भटेवरा यांनी आभार मानले.

पुणे | रोटरी क्लब पुणे कॅन्टोन्मेंट यांच्या तर्फे ’द लास्ट वर्ड’ या वार्षिक आंतर संस्था वादविवाद स्पर्धेचे आयोजन नुकतेच सुमंत मुळगावकर सभागृह, आयसीसी टॉवर सेनापती बापट रोड येथे करण्यात आले होते. या स्पर्धेत कॉलेज ऑफ मिलिटरी इंजिनिअरींगच्या कॅडेट ट्रेनिंंग विंगने आणि आर्मी पब्लिक स्कुल, खडकी ने आपआपल्या गटांत विजेतेपद पटकावले.

हा उपक्रम १९८९ मध्ये सुरू झाला असून यंदा ३० वर्षे पूर्ण झाली आहेत. कॉलेज ऑफ मिलिटरी इंजिनिअरींगच्या कॅडेट ट्रेनिंंग विंगचे प्रतिनिधित्व जोरावर सिंग याने केले, तर आर्मी पब्लिक स्कुलचे प्रतिनिधित्व अनुष्का पन्नु हिने केले. सिम्बायोसिस इन्स्टिट्युट ऑफ मॅनेजमेंट स्टडीजच्या चिराग सिन्हा आणि द बिशप्स ज्युनिअर कॉलेज, कॅम्पच्या ध्वनी श्रोत्रीय यांनी उपविजेतेपद पटकावले. ही स्पर्धा शाळा व महाविद्यालय या दोन प्रकारांत पार पडली. या स्पर्धेकरिता आर्टिफिशियल इंटेलिजन्स अ‍ॅझ्युमिंग कंट्रोल इन फ्युचर इस अ बून व अवर लाईफस्टाईल लिव्हज व्हेरी लिटिल रूम फॉर इंटर्नल अ‍ॅन्ड स्पिरिच्युअल ग्रोथ हे विषय होते.

या कार्यक्रमाला नरेंद्र गोडानी, डॉ.जॉन सॅमसन व कुणाल सरपाल यांनी परीक्षक म्हणून काम पाहिले. तर स्पर्धेच्या अध्यक्षस्थानी रोटरी क्लब पुणे कॅन्टोन्मेंटचे माजी अध्यक्ष डॉ.नितीन शाह होते. याप्रसंगी रोटरी क्लब पुणे कॅन्टोन्मेंटचे अध्यक्ष पंकज आपटे,मयांक नायडू व नितेश अगरवाल उपस्थित होते. मोहित अगरवाल हे प्रोजेक्ट चेअरमन तर रोटेरियन हसीब फकीह यांनी सूत्रसंचालनाचे काम पाहिले. याप्रसंगी सुमलता बंटवाल, रोटेरियन प्रभाकर बंटवाल यांच्या हस्ते विजेत्यांना ट्रॉफी व पुरस्कारांचे वितरण करण्यात आले. टोस्टमास्टर्स इंटरनॅशनलचे प्रोग्राम क्वालिटी डायरेक्टर वेंकटा रमणा दित्तकवी विशेष अतिथी म्हणून उपस्थित होते.