नवी दिल्ली | कोल्हापूर ते वैभववाडी या बहुचर्चित रेल्वे मार्गाला केंद्रीय मंत्रीमंडळाने मान्यता दिली आहे. या प्रकल्पाच्या कामाला लवकरच सुरुवात होणार असून पाच महिन्यात या प्रकल्पाच्या पहिल्या रेल्वे स्टेशनचे उद्घाटन होणार आहे. २०१९ च्या जानेवारी महिन्यात हे उदघाटन होणार आहे. या संदर्भात सुरेश प्रभू यांनी माध्यमांना माहिती दिली आहे.
१०३ किलोमीटर लांबी असणाऱ्या लोहमार्गाची दहा स्थानके नव्याने वाढवण्यात आली आहेत. इंदापूर, गोरेगाव, सोपे-वामने, कळंबी, कडवाई, वेरावळी, खेरे पाटण, अछीमे, मिरज आणि इनांजे ही नवीन स्थानके आराखड्यात सामील झाले आहेत. या प्रकल्पाचे काम ५० – ५० टक्के केंद्र-राज्य भागीदारी वर होणार असून त्याला ४० अब्ज डॉलर निधी खर्च होणार आहे.

तासगाव | आठ महिण्यांच्या गर्भवती महिलेवर सामुहिक बलात्कार झाल्याचा धक्कादायक प्रकार सातारा जिल्ह्यातील तासगाव येथे झाला आहे. सदर घटना मंगळवारी मध्यरात्री घडली असून तासगाव आणि परिसरात एकच खळबळ उडाली आहे.
हाती आलेल्या माहितीनुसार, गर्भवती महिलेच्या पतीला मोटारीमधे डांबून ठेवून काही नराधमांनी आठ महिण्याच्या गर्भवती महिलेवर सामुहिक बलात्कार केला. अजुनपर्यंत एकाही आरोपीचे नाव व पत्ता पोलीसांच्या हाती न लागल्याने या गुन्ह्याचा छडा लावने तासगाव पोलीसांसाठी आव्हान बनले आहे.

पुणे | सांगवीमध्येऔंध कामगार वसाहती जवळ एक बेवारस मृतदेह आढळला आहे. मृतदेहावर धारधार शस्त्रांचे वार असून डोक्यात दगड घालून ओळख पुसून टाकण्याचा प्रयत्न करण्यात आला आहे. मृत व्यक्तीच्या खिशात आधार कार्ड सापडल्याने मृताची ओळख पटू शकली आहे. अजित नंदकुमार भुईया (वय ३५) असे मृत व्यक्तीचे नाव असून तो झारखंडचा मूळ रहिवासी आहे.
खून मध्यरात्री झाल्याचा प्राथमिक अंदाज पोलिसांनी लावला आहे. खून करून मृतदेह त्या ठिकाणी रात्रीच्या अंधारात आणून टाकला होता पहाटे लोक बाहेर पडल्यावर त्यांनी पोलिसांना फोन लावल्याने हा प्रकार उजेडात आला आहे. सांगवी पोलीस हत्येचा पुढील तपास करत आहेत.

नवी दिल्ली | धडाडीचे निर्णय घेण्यासाठी प्रसिद्ध असलेल्या नितीन गडकरी यांनी आज पत्रकार परिषद घेऊन आणखी एका नव्या निर्णयाची घोषणा केली आहे. मनमाड – इंदोर रेल्वे मार्गाची घोषणा गडकरी यांनी दिल्लीतील पत्रकार परिषदेत केली आहे. ३६२ किलोमीटर लांब लोहमार्गाच्या खर्चाची अंदाजित रक्कम ८,५७४ कोटी रुपये इतकी आहे. त्याचा महाराष्ट्रात येणारा भाग १८६ किलोमीटर इतका असून मध्यप्रदेशात १७६ किलोमीटर एवढा भाग येतो आहे.
बहु प्रतिक्षित असणारा हा रेल्वे मार्ग मंजूर झाल्याने देशाच्या या भागात आनंद व्यक्त केला जात आहे. महाराष्ट्रातील खान्देशाला मध्यप्रदेशाशी जोडण्यात हा लोहमार्ग दुवा ठरणार आहे. सुभाष भामरे यांच्या लोकसभा मतदारसंघाला या लोह मार्गाचा सर्वाधिक फायदा होत असल्याने त्यांनी गडकरींचे आणि मोदींचे आभार मानले आहेत.

सासवड | भिवरी गावचे माजी उपसरपंच संतोष साधू दळवी (वय ३६) यांची पूर्व वैमनस्यातून दगडाने ठेचून हत्या करण्यात आली आहे. यासंदर्भात साधू अनंता दळवी यांनी सासवड पोलिसात फिर्याद दिली आहे.

हाती आलेल्या माहीतीनुसार संतोष दळवी यांच्यावर गावठी कट्ट्याच्या साहाय्याने गोळी झाडण्याचा प्रयत्न करण्यात आला. परंतू तो प्रयत्न अयशस्वी झाल्याने आरोपींनी दळवी यांना दगडाने ठेचून मारले. सदरची घटना मंगळवारी रात्री ९.३० च्या सुमारास घडली आहे.
दत्तात्रय कटके, भारत कटके, दादासाहेब कटके, हेमंत गायकवाड, दीपक भांडवलकर, अक्षय गायकवाड, आदेश पवार, बाळू गायकवाड, मोहन गायकवाड यांच्या विरुद्ध फिर्याद दाखल करण्यात आली आहे. सदर सर्व आरोपी भिवरी गावचे रहिवाशी आहेत. पोलीसांनी अद्याप कोणालाच अटक केली नसुन घटनेचा तपास सासवड पोलीस करत आहेत.