नवी दिल्ली | अमेरिकेने निर्बंध घातल्याने इराणकडून तेलखरेदी करणे बंद करण्याचे जवळपास निश्चित झाले आहे. असे झाले तर भारतातील इंधनाच्या किंमती आणखी वाढण्याची शक्यता वर्तवण्यात येत आहे. यामुळे भारतीय अर्थव्यवस्थेला मोठा फटका बसणार असल्याचे बोलले जात आहे. तसेच इराणलाही याचा जोरदार फटका बसणार असून आंतरराष्ट्रीय व्यापारावर याचा परिणाम होईल असे म्हटले जात आहे.
भारतीय तेल रिफायनरी कंपनी इंडियन ऑईल कार्पोरेशन आणि भारत पेट्रोलियम यांनी नोव्हेंबरमध्ये तेल खरेदी करण्यासाठी नोंदणीच केली नसल्याने भारत इराणकडून तेलखरेदी करणे बंद करणार आहे यावर शिक्कामोर्तब होत आहे. अमेरिकेने इराणकडून तेल खरेदीला ४ नोव्हेंबरची शेवटची मुदत देण्यात आली आहे. २०१४ नंतर प्रथमच तेलाची किंमत १०० डॉलरच्या वर जाण्याची शक्यता आहे.
इराणवरील निर्बंधांमुळे त्या देशाकडून येणाऱ्या कच्च्या तेलामध्ये घट झाली आहे. यामुळे बॅरलचा दर चार वर्षातील सर्वोच्च पातळीवर आहे. उत्पादन कमी झाल्याने तेलाच्या किंमती वाढणार आहेत. यामुळे रिफायनरी दुसऱ्या देशांकडून तेल आयात करण्याचा विचार करत आहेत. जगातील सौदी अरब, संयुक्त अरब अमिरात आणि रशियाकडेच उत्पादन वाढविण्याची क्षमता आहे.
चीननंतर भारत हा इराणकडून तेल विकत घेणारा दुसरा मोठा देश आहे. भारताने यंदा प्रति दिन सरासरी ५ लाख ७७ हजार बॅरल तेल मागविले आहे. हे तेल मध्य पूर्व देशांच्या तुलनेत २७ टक्के आहे.
