हॅलो महाराष्ट्र ऑनलाईन । दाक्षिणात्य सुपरस्टार रजनीकांत यांचा देशात मोठा चाहतावर्ग आहे. आपल्या ऍक्शन सिनेमांमुळे ते सर्वांच्या गळ्याचे ताईत बनले आहेत. त्यांच्या हटके अंदाजामुळे अनेकांना ते खूप आकर्षक वाटतात. काही लोक तर त्यांना देव मानतात. त्यामुळे त्यांच्याबद्दल जर काही नकारात्मक समोर आले तर त्यांचे चाहते संतापतात. अशीच एक घटना समोर आली आहे. अभिनेता रोहित रॉय याने त्याच्या इंस्टाग्राम अकॉउंटवरून एक पोस्ट केली आहे. ज्यामध्ये रजनीकांत यांना कोरोना झाल्याचे त्याने म्हंटले आहे. त्याच्या या पोस्टनंतर रजनीकांत यांच्या चाहत्यांनी रोहित रॉय ना चांगलेच ट्रोल केले आहे.
एरवी रजनीकांत यांच्यावर अनेक विनोद व्हायरल होत असतात. त्याचा आनंदही सगळे घेतात. अभिनेता रोहित रॉय याने अशाच मजेशीर अंदाजात ही पोस्ट केली होती. ज्यात त्याने लिहिले होते. की ‘रजनीकांत यांची कोरोना चाचणी सकारात्मक आली आहे. आता कोरोनाला विलगीकरणात ठेवण्यात आले आहे.’ त्याने विनोदी ढंगात ही पोस्ट केली होती. या तणावपूर्ण वातावरणाला थोडे हलकेफुलके करण्यासाठी ही पोस्ट केल्याचे तो म्हणाला. मात्र हा विनोद रजनीकांत यांच्या चाहत्यांना आवडलेला दिसला नाही.
https://www.instagram.com/p/CA9cNqShyuv/
चाहत्यांकडून हा विनोद असंवेदनशील असल्याची भावना व्यक्त होत असून त्यांनी रोहित रॉयला ट्रोल केले आहे. सोशल मीडियावर ट्रोल झाल्यानंतर रोहितनेही याबाबत प्रतिक्रिया दिली आहे. ट्रोलर्सला उत्तर देत रोहितने सर्वांना शांत व्हायला सांगितले. हा केवळ एक विनोद आहे असे त्याने सांगितले. मी टिपिकल रजनी स्टाईलने विनोद केला होता. यातून कुणालाही दुखावण्याचा हेतू नव्हता. मी केवळ थोडे हसवण्याचा प्रयत्न करत होतो. प्रतिक्रिया देण्याआधी समोरच्या व्यक्तीचा हेतू पाहणं हे देखील महत्त्वाचं असल्याचं तो म्हणाला.