हॅलो महाराष्ट्र ऑनलाइन | मशिदी वरील भोंग्या वरून मनसे अध्यक्ष राज ठाकरे यांनी शिवसेनेला घेरण्याचा प्रयत्न केला आहे. भोंग्याबाबत बाळासाहेब ठाकरेंच्या विचाराचा एक व्हिडिओ राज ठाकरेंनी शेअर करत शिवसेनेला डिवचले. त्यानंतर शिवसेना खासदार संजय राऊत यांनी राज ठाकरेंना प्रत्युत्तर दिले आहे. बाळासाहेबांची साथ सोडणाऱ्यांनी आम्हांला शिकवू नये असे म्हणत संजय राऊत यांनी राज ठाकरेंवर पलटवार केला . ते प्रसारमाध्यामांशी बोलत होते
बाळासाहेबांचे जुने काय प्राचीन व्हिडीओ जरी टाकले, तरी आम्हाला बाळासाहेबांविषयी कुणी सांगण्याची गरज नाही. ज्यांनी बाळासाहेबांना सोडलं, त्यांचे विचार सोडले, आणि ज्यांनी सेनेच्या पाठीत खंजीर खुपसला त्या भाजपचे उपवस्त्र म्हणून राहतात त्यांनी आम्हाला शिकवण्याची गरज नाही असे म्हणत संजय राऊत यांनी राज ठाकरेंना फटकारले
बाळासाहेब ठाकरे आमचा श्वास आहेत. आम्ही आजही त्यांच्या विचाराने चालतो. आम्हाला बाळासाहेबांच्या बद्दल शिकवण्याची गरज नसून त्यांनीच बाळासाहेबांना समजले पाहिजे असं म्हणत राऊतांनी राज ठाकरेंवर हल्लाबोल केला . तसेच ज्या तुमच्या मास्तरांनी तुम्हाला धडे दिले, त्यांचे हिंदुत्व बोगस आहे असे म्हणत त्यांनी भाजपवर देखील नेम धरला