24 तासात तिघांनी संपवलं आयुष्य, यामध्ये 19 वर्षीय तरुणाचा समावेश

बीड : हॅलो महाराष्ट्र – बीड जिल्ह्यात गेल्या 24 तासांत तीन जणांनी आत्महत्या केल्याने संपूर्ण बीड जिल्हा हादरला आहे. या तिन्ही आत्महत्या प्रकरणामध्ये एका 19 वर्षीय तरुणाचासुद्धा समावेश आहे.

पोलिसांनी दिलेल्या माहितीनुसार, पहिल्या घटनेत माजलगाव शहरालगत असणाऱ्या केसापुरी कॅम्प या ठिकाणी राहणारे सुरेश रामकिसन बडे या शिक्षकाने राहत्या घरी आत्महत्या केली आहे. मृत सुरेश बडे हे गेल्या काही दिवसांपासून नैराश्यात होते. याच नैराश्यातून त्यांनी आज पहाटे 3 वाजता आपल्या राहत्या घरी गळफास घेऊन आत्महत्या केली आहे. पोलीस या प्रकरणाचा अधिक तपास करत आहेत.

तर दुसरी घटना बीड जिल्ह्यातील राजेवाडी या ठिकाणी घडली आहे. यामध्ये कृष्णा बालासाहेब कोके या तरुणाने अज्ञात कारणावरून रात्री साडेआठ वाजण्याच्या सुमारास कमरेला असलेल्या बेल्टच्या सहाय्याने राहत्या घरी गळफास घेऊन आत्महत्या केली आहे. मृत कृष्णा बालासाहेब कोके हा अवघ्या 19 वर्षांचा तरुण होता. त्याने आत्महत्येसारखे टोकाचे पाऊल का उचलले हे अजून स्पष्ट झाले नाही. कृष्णाच्या आत्महत्येमुळे परिसरात हळहळ व्यक्त केली जात आहे. दिंद्रुड पोलिस या घटनेचा अधिक तपास करत आहेत.

तर तिसरी घटना राजेगाव या ठिकाणी घडली आहे. मृत रामचंद्र धुराजी गरड यांनी व्यवहारातील आर्थिक जाचाला कंटाळून शेतातील लिंबाच्या झाडाला गळफास लावून आपल्या आयुष्याचा शेवट केला आहे. याप्रकरणी माजलगाव ग्रामीण ठाण्यात अकस्मात मृत्यूची नोंद करण्यात आली आहे. गेल्या २४ तासांत आत्महत्येच्या तीन घटना घडल्याने संपूर्ण माजलगाव तालुका हादरला आहे.