हॅलो महाराष्ट्र ऑनलाईन । अमरावतीच्या अचलपूर विधानसभा मतदारसंघाचे अपक्ष आमदार बच्चू कडू ((Bachchu Kadu) यांचा अपघात झाला आहे. रस्ता क्रॉस करताना बच्चू यांना एका दुचाकीस्वाराने जोरदार धडक दिली. या धडकेत बच्चू कडू जखमी झाले असून त्यांना तातडीने अमरावतीच्या (Amravati) एका खासगी रुग्णालयात उपचारासाठी दाखल करण्यात आले आहे.
आज बुधवारी सकाळी ६ च्या आसपास हा अपघात झाला. या अपघातात बच्चू कडू यांच्या डोक्याला, हाताला आणि पायाला जोरात मार लागला आहे. त्यांच्या डोक्यातून मोठ्या प्रमाणावर रक्तस्त्रावही झाला आहे. सुदैवाने बच्चू कडू या अपघातातून बचावले आहेत. बच्चू कडू यांच्या डोक्याला ४ टाके पडले आहेत.
दरम्यान, मागील एका महिन्यात अनेक राजकीय नेत्यांचा अपघात झाला आहे. भाजप आमदार जयकुमार गोरे यांची गाडी नदीत कोसळली होती. त्यांनतर राष्ट्रवादी काँग्रेचे आमदार धनंजय मुंडे यांच्या गाडीला अपघात झाला होता. त्यातच २ दिवसांपूर्वी शिंदे गटाचे आमदार योगेश कदम यांचाही अपघात झाला होता, गेल्या काही दिवसांतील अपघाताच्या या घटना पाहता आमदारांच्या सुरक्षेबाबत प्रश्नचिन्ह निर्माण झाले आहे.