हॅलो महाराष्ट्र ऑनलाइन | भाजप नेते आणि केंद्रीय मंत्री नारायण राणे अडचणीत सापडले आहेत. मुंबई महापालिकेने राणेंच्या जुहूतील बंगल्यात झालेल्या अनधिकृत बांधकामाप्रकरणी नोटीस बजावली आहे. तसेच याबाबत पाहणी करण्यासाठी महापालिकेचं एक पथक राणेंच्या घरी जाणार आहे.
2017मध्ये नारायण राणे यांच्या जुहू येथील अधिश बंगल्याबाबतची तक्रार महापालिकेकडे करण्यात आली होती. तक्रारीत बंगल्याचे बांधकाम सीआरझेडचे उल्लंघन करुन केल्याचे म्हटले होते. मुंबई महापालिका कायदा, १८८८ च्या कलम ४८८ अंतर्गत नोटीस पाठवली आहे.
बीएमसीच्या अधिकाऱ्यांनी सांगितले की, बंगल्याची तपासणी केल्यानंतर, अनधिकृत बांधकाम आढळल्यास, बंगल्याची वैधता सिद्ध करण्यासाठी त्यांना आणखी एक नोटीस बजावली जाईल. तसेच कायदेशीर कागदपत्रे प्रदान करण्यात त्यांनी अपयशी ठरल्यास, पाडण्याची कारवाई केली जाईल.
अधिश बंगला गेल्या काही वर्षांपासून वादात आहे. सीआरझेडचे नियम धाब्यावर बसवून बंगल्याचं बांधकाम झाल्याचं अधिकाऱ्यांनी य सांगितलं. हा बंगला समुद्र किनाऱ्यापासून ५० मीटरवर आहे. त्यामुळे सीआरझेडच्या नियमांचं उल्लंघन होत असल्याचं अधिकारी म्हणाले.