EMI कमी करण्याच्या नादात कर्जाचा भार वाढवू नका, स्वस्त कर्जाचे गणित अशा प्रकारे समजून घ्या

नवी दिल्ली । रिझर्व्ह बँक ऑफ इंडिया (RBI) ने नुकताच रेपो दर 20 वर्षांच्या नीचांकी पातळीवर ठेवला आहे, ज्यामुळे आता सर्व प्रकारचे रिटेल लोन परवडणारे झाले आहेत. याच संधीचा फायदा घेण्यासाठी मोठ्या संख्येने लोकं होम, ऑटो किंवा बिझनेस लोन घेण्याची तयारी करत आहेत.

जर तुम्ही देखील लोन घेण्याचा विचार करत असाल तर EMI ची रक्कम कमी ठेवण्यासाठी त्याचा कालावधी वाढवू नका. हे तुम्हाला नफा कमी आणि जास्त नुकसानीचे ठरेल. इतकेच नाही तर ज्या ग्राहकांनी आधीच कर्ज घेतले असेल आणि त्यांना EMI चा बोझा कमी करण्यासाठी मुदत वाढवायची असेल तर त्यांना याचा विचार करावा लागेल. यामुळे तुम्हाला तात्काळ दिलासा मिळू शकतो, मात्र दीर्घकाळात कर्जाची परतफेड केल्यास लाखोंचा बोझा वाढू शकतो.

EMI ऐवजी व्याज कमी करण्यावर भर द्या
बँकिंग एक्सपर्ट आणि व्हॉईस ऑफ बँकिंगचे सचिव अश्वनी राणा म्हणतात की,”ग्राहकाने लोन घेताना EMI ची रक्कम कमी करण्याऐवजी व्याजदर कमी करण्याचा आग्रह धरला पाहिजे. होम लोन दीर्घ मुदतीचे असल्याने, तुमची EMI कमी होईल म्हणून मुदत वाढवू नका. त्याचा परिणाम EMI च्या रकमेवर किरकोळ असेल मात्र तुम्हाला व्याज म्हणून द्यावी लागणारी एकूण रक्कम खूप जास्त असेल.”

नुकसानीचे गणित अशाप्रकारे समजून घ्या
जर तुम्ही SBI कडून 30 लाख रुपयांचे होम लोन घेतले असेल, ज्याचा व्याज दर 7.40% आहे आणि कर्जाची परतफेड करण्याची मुदत 20 वर्षे आहे. अशा परिस्थितीत तुमचा EMI 23,985 रुपये असेल आणि एकूण 27,56,325 रुपये व्याज म्हणून भरावे लागतील. अशा प्रकारे, संपूर्ण कर्जाची किंमत 57,56,325 रुपये होईल. आता, तुम्ही त्याच व्याजावर तेच कर्ज घेतले आहे मात्र परतफेडीचा कालावधी 30 वर्षांपर्यंत वाढवला आहे. तुम्हाला EMI म्हणून 20,771 रुपये द्यावे लागतील जे आधीच कमी आहे, मात्र एकूण देय व्याज 44,77,702 रुपये असेल आणि कर्जाची एकूण किंमत 74,77,702 रुपये असेल.

आता बघा 10 वर्षात किती बोझा वाढला ?
अशा प्रकारे, 10 वर्षांचा कालावधी वाढवल्यानंतर EMI रक्कम 3,214 रुपयांनी कमी झाली आहे, तर तुम्हाला एकूण व्याज म्हणून 17,21,377 रुपये अधिक द्यावे लागतील. ही रक्कम तुमच्या पूर्वीच्या व्याजापेक्षा सुमारे 60 टक्के जास्त आहे.

दीर्घकालीन कर्जामुळे बचतीवर परिणाम होईल
BankBazaar.com चे CEO आदिल शेट्टी म्हणतात की, तुमची EMI परतफेड करण्याची क्षमता आणि कर्जाचा कालावधी यांच्यातील योग्य संतुलन शोधा. एखाद्याने खूप लांब कर्ज देखील घेऊ नये, कारण ते तुमचे व्याज वाढवते, ज्यामुळे भविष्यात बचत कमी होईल.”

EMI तुमच्या पगाराच्या 40% पर्यंत असावा (Take Home Pay). यापेक्षा जास्त केले तर दैनंदिन खर्च भागवणे अवघड होईल.