शरद पवारांच्या डोक्यात आयपीएलची कल्पना आली कुठून??

हॅलो महाराष्ट्र ऑनलाइन | जगभरात इंडियन प्रीमिअर लीग म्हणजेच आयपीएल सर्वात श्रीमंत क्रिकेट लीग म्हणून ओळखली जाते. आयपीएल मुळे भारतीय क्रिकेट अजून मजबूत झाले आणि देशातील युवा खेळाडूंना आपली छाप पाडण्यासाठी एक मोठं व्यासपीठ उपलब्ध झाले. पण तुम्हांला हे माहीत आहे का? की आयपीएल ही संकल्पना कोणाची आहे? ही संकल्पना राष्ट्रवादी काँग्रेसचे अध्यक्ष शरद पवार यांचीच…

शरद पवार हे मुरब्बी राजकारणी जरी असले तरी त्यांचे खेळांवरील प्रेम हे सर्वांनाच माहीत आहे. विशेष म्हणजे ज्या क्रिकेटला भारतात धर्म मानतात तो क्रिकेट हा खेळही शरद पवारांच्या आवडीचा विषय…. शरद पवार बीसीसीआय आणि आयसीसीचे अध्यक्ष झाले. त्यानंतर त्यांनी अनेक देशांची आणि क्रिकेट खेळाशी संबंधित व्यक्तींशी जवळीक वाढवली.

कुठून आणि कशी सुचली कल्पना-

शरद पवार तेव्हा इंग्लंड ला गेले असता तेथील फुटबॉलच्या सामन्यांमधील चुरस पहायचे. इंग्लंड मधील स्थानिक शहरांचे फुट बॉल मधील क्लब सामने पाहून क्रिकेट मध्येही असं काही करता येईल का? असा प्रश्न शरद पवार यांना पडला. शरद पवार यांनी ही कल्पना ललित मोदी यांना सांगितली आणि या कल्पनेला विकसित करण्याची जबाबदारीही शरद पवारांनी ललित मोदी यांच्यावर सोपवली.

शरद पवार यांच्या सूचनेनुसार ललित मोदी कामाला लागले आणि त्यांनी इंडिअन प्रीमिअर लीग नावाने मोठी क्रिकेट स्पर्धा सुरू केली. भारतातील मोठ्या उद्योजकांनी या स्पर्धेत गुंतवणूक केली. आयपीएलमुळे बीसीसीआय अजून श्रीमंत झाली. आणि खेळाडूंनाही याचा फायदा झाला. येवडच नव्हे तर देशभरातील युवा खेळाडूंना अनेक दिग्गजांबरोबर खेळण्याची संधी मिळाली.