शहरात कायद्याचा धाक संपला? मध्यरात्री टोळक्याची तरुणाला बेदम मारहाण 

औरंगाबाद – शहरातील सातारा परिसरात धक्कादायक घटना घडली. साते ते आठ जणांच्या टोळक्याने एका तरुणाला बेदम मारहाण केली. मारणाऱ्या तरुणांनी घोळका करून एकानंतर एक असे तरुणाला मारायला सुरुवात केली. त्यानंतर लाठ्या-काठ्या आणि दगडानेही मारलं. बुधवारी रात्री घडलेल्या या घटनेचा व्हिडिओ सध्या सोशल मीडियावर व्हायरल झाला आहे. पण यामुळे कायदा आणि सुव्यवस्थेचा प्रश्न पुन्हा एकदा ऐरणीवर आला आहे. सातारा पोलीस स्टेशनच्या हद्दीतील सुधाकर नगर रोडवर ही घटना घडली आहे.

दरम्यान, रात्री अशा प्रकारचा हल्ला झाल्यामुळे घटनेतील तरुण गंभीर जखमी झाला आहे. किरकोळ वादातून हा प्रकार घडल्याची प्राथमिक माहिती हाती आली आहे. मात्र या प्रकरणी जखमी तरुणाच्या वतीने कुणाकडूनही पोलीस ठाण्यात तक्रार दाखल करण्यात आलेली नाही. जखमी तरुणावर रुग्णालयात उपचार सुरु आहेत.

शहरातील बीड बायपास रोडवरील बजाज हॉस्पिटलच्या मागे सुधाकर नगर परिसरात ही घटना घडली. मारहाण सुरु झाल्यानंतर या आवाजाने आजूबाजूचे नागरिक गोळा झाले. त्यांनी पोलिसांना सदर घटनेची माहिती दिली. पोलीस घटनास्थळी दाखल झाल्यानंतर राडा थांबवण्यात आला. जखमी तरुणाला रुग्णालयात दाखल करण्यात आले. या थरारक घटनेचा व्हिडिओ सध्या सोशल मीडियावर प्रचंड व्हायरल होत आहे.