सेंच्युरियन । भारत आणि दक्षिण आफ्रिका यांच्यातील तीन सामन्यांची कसोटी मालिका 26 डिसेंबरपासून सुरू होत आहे. टीम इंडियाला अजूनही दक्षिण आफ्रिकेत कसोटी मालिका जिंकता आलेली नाही. अशा परिस्थितीत कर्णधार विराट कोहली आणि प्रशिक्षक राहुल द्रविडसाठी यावेळीही हा दौरा सोपा असणार नाही. संघाने आतापर्यंत येथे 3 कसोटी जिंकल्या आहेत. यामध्ये प्रशिक्षक राहुल द्रविड, माजी ऑफस्पिनर हरभजन सिंग आणि व्हीव्हीएस लक्ष्मण यांनी अप्रतिम कामगिरी केली. संघाला पहिला आणि शेवटचा विजय कधी मिळाला ते जाणून घेउयात.
टीम इंडियाने 2006 मध्ये दक्षिण आफ्रिकेत पहिली कसोटी जिंकली होती. जोहान्सबर्ग येथे 15 ते 18 डिसेंबर दरम्यान झालेला सामना संघाने 123 धावांच्या मोठ्या फरकाने जिंकला. या सामन्यात भारताकडून केवळ 2 अर्धशतके झाली. कर्णधार राहुल द्रविडने नाणेफेक जिंकून फलंदाजीचा निर्णय घेतला. संपूर्ण संघ 79.5 षटकांत 249 धावांत गारद झाला. सौरव गांगुलीने सर्वाधिक 51 धावा केल्या. सचिन तेंडुलकरने 44 तर राहुल द्रविडने 32 धावा केल्या. वेगवान गोलंदाज शॉन पोलॉकने 4 बळी घेतले.
एस श्रीशांतने 5 विकेट्स घेत दिले प्रत्युत्तर
प्रत्युत्तरात दक्षिण आफ्रिकेचा संघ पहिल्या डावात 25.1 षटकेच फलंदाजी करू शकला. 84 धावा करून संघ बाद झाला. 8 खेळाडू तर दहाच्या आकड्यालाही स्पर्श करू शकले नाहीत. ऍशवेल प्रिन्सने सर्वाधिक 24 धावा केल्या. टीम इंडियाच्या वतीने वेगवान गोलंदाज एस श्रीशांतने 40 धावांत 5 बळी घेतले. अशाप्रकारे भारतीय संघाने 165 धावा करत मोठी आघाडी मिळवली. दुसऱ्या डावात व्हीव्हीएस लक्ष्मणच्या 73 धावांच्या जोरावर संघाने 236 धावा केल्या. अशाप्रकारे दक्षिण आफ्रिकेला 402 धावांचे मोठे लक्ष्य मिळाले. मात्र संपूर्ण संघ 278 धावांत गारद झाला. संघाने हा सामना 123 धावांनी जिंकला. श्रीशांत, झहीर खान आणि अनिल कुंबळे या तिघांनीही दुसऱ्या डावात प्रत्येकी 3 बळी घेतले. श्रीशांतला सामनावीराचा पुरस्कार मिळाला.
2010 मध्ये हरभजन आणि लक्ष्मणने विजय मिळवून दिला
या संघाने डिसेंबर 2010 मध्ये दक्षिण आफ्रिकेत डर्बन येथे दुसऱ्यांदा कसोटी जिंकली. प्रथम खेळताना टीम इंडिया 205 धावांवर आटोपली. व्हीव्हीएस लक्ष्मणने सर्वाधिक 38 धावा केल्या. हरभजन सिंगनेही 21 धावांचे योगदान दिले. डेल स्टेनने 6 विकेट घेतल्या. प्रत्युत्तरात दक्षिण आफ्रिकेचा डाव 131 धावांवर आटोपला. हरभजनने 4 तर झहीरने 3 बळी घेतले. लक्ष्मणच्या 96 धावांच्या संघर्षपूर्ण खेळीमुळे भारताने दुसऱ्या डावात 228 धावा केल्या. अशाप्रकारे यजमान संघाला 303 धावांचे लक्ष्य मिळाले. मात्र संपूर्ण संघ 215 धावांत गारद झाला. अशा प्रकारे भारताने हा सामना 87 धावांनी जिंकला. दुसऱ्या डावात झहीर खान आणि एस श्रीशांतने 3-3 तर हरभजन सिंगने 2 बळी घेतले.
पहिल्या डावात पिछाडीवर पडल्यानंतर मिळवला विजय
टीम इंडियाने दक्षिण आफ्रिकेमध्ये शेवटची कसोटी जानेवारी 2018 मध्ये जिंकली होती. जोहान्सबर्गमध्ये खेळल्या गेलेल्या सामन्यात टीम इंडिया पहिल्या डावात केवळ 187 धावा करून बाद झाली. कर्णधार विराट कोहलीने 54 आणि चेतेश्वर पुजाराने 50 धावा केल्या. प्रत्युत्तरात दक्षिण आफ्रिकेने 194 धावा केल्या आणि 7 धावांची आघाडी घेतली. टीम इंडियाने दुसऱ्या डावात 247 धावा केल्या. अजिंक्य रहाणेने सर्वाधिक 48 धावांचे योगदान दिले. अशाप्रकारे यजमानांना 241 धावांचे लक्ष्य मिळाले आणि संपूर्ण संघ 177 धावांवर गारद झाला. मोहम्मद शमीने 5 बळी घेतले. अशा प्रकारे संघाने हा सामना 63 धावांनी जिंकला.