नवी दिल्ली । आता रात्रीच्या वेळी ट्रेनमधून प्रवास करणाऱ्या प्रवाशांच्या झोपेचा भंग होणार नाही. तुमच्या आजूबाजूला जाणारा कोणीही मोबाईल फोनवर मोठ्याने बोलू शकणार नाही किंवा मोठ्या आवाजात गाणी ऐकू शकणार नाही. प्रवाशांची सोय लक्षात घेऊन भारतीय रेल्वेने मोठा निर्णय घेतला आहे. प्रवाशांनी केलेल्या तक्रारींवरून रेल्वे अशा लोकांवर कारवाई करणार आहे. इतकेच नाही तर रेल्वे कर्मचाऱ्यांची जबाबदारीही निश्चित केली जाऊ शकते. या संदर्भात, रेल्वे मंत्रालयाने सर्व झोनला आदेश जारी केले आहेत, जेणेकरुन या आदेशाची त्वरित अंमलबजावणी करता येईल.
रेल्वे मंत्रालयाच्या म्हणण्यानुसार, प्रवासी अनेकदा तक्रार करत असतात की सहप्रवासी मोबाईलवर मोठमोठ्याने बोलतात किंवा गाणी ऐकतात. रात्री डब्यात बसलेले काही ग्रुप जोराने चर्चा करत असल्याच्याही तक्रारीही होत्या. रेल्वेचे एस्कॉर्ट किंवा मेंटेनन्स कर्मचारी गस्तीदरम्यान मोठ्याने बोलतात, त्यामुळे प्रवाशांची झोप उडते, अशीही तक्रार करण्यात आली होती. याशिवाय रात्रीच्या वेळी दिवे लावण्यावरूनही वाद होत होते, त्याबाबत रेल्वेकडे तक्रारी येत होत्या.
प्रवाशांना होणारा त्रास लक्षात घेऊन भारतीय रेल्वेने एक मोठा निर्णय घेत आदेश जारी केला आहे. आता कोणताही प्रवासी यासंबंधी तक्रार करू शकतो, ज्यावर रेल्वे कर्मचारी तत्काळ कारवाई करतील. तक्रारीचे निराकरण न झाल्यास आता रेल्वे कर्मचाऱ्यांची जबाबदारीही निश्चित होऊ शकते. या आदेशांची तात्काळ अंमलबजावणी करण्यात आली आहे.
रात्री 10 वाजेनंतरच्या मार्गदर्शक सूचना खालीलप्रमाणे आहेत
कोणताही प्रवासी मोबाईलवर इतक्या मोठ्या आवाजात बोलणार नाही किंवा मोठ्या आवाजात गाणी ऐकणार नाही, की सहप्रवास्यांना त्रास होईल.
रात्रीच्या वेळी सहप्रवाशांच्या झोपेचा त्रास होऊ नये म्हणून रात्रीचे दिवे सोडून इतर सर्व दिवे बंद करावे लागतात.
ग्रुपमध्ये प्रवास करणाऱ्या प्रवाशांना रात्री उशिरापर्यंत ट्रेनमध्ये बोलता येणार नाही. सहप्रवाशांच्या तक्रारीवर कारवाई करता येईल.
रात्रीच्या वेळी चेकिंग कर्मचारी, आरपीएफ, इलेक्ट्रिशियन, केटरिंग कर्मचारी आणि मेन्टनन्स कर्मचारी त्यांचे काम शांततेत करतील, जेणेकरून प्रवाशांना त्रास होणार नाही.
यासह, रेल्वे कर्मचारी वृद्ध, अपंग आणि 60 वर्षांपेक्षा जास्त वयाच्या अविवाहित महिलांना तत्काळ मदत करतील.
