कराड प्रतिनिधी | सकलेन मुलाणी

कोरोनाच्या पार्श्वभूमीवर शासनाने वेळोवेळी केलेल्या निर्देशांचे व आदेशांचे उल्लघंन केल्याप्रकरणी शिवप्रतिष्ठान हिंदूस्थानचे संस्थापक संभाजीराव भिडे गुरुजी यांच्यासह 70 ते 80 धारकर्‍यांवर गुन्हा दाखल करण्यात आला आहे. सोमवार दि. 5 रोजी जिल्हाधिकार्‍यांच्या आदेशाचे  उल्लघंन करुन त्यांनी कराड शहरात बेकायदा जमाव जमवून रॅली काढली व मंदीर प्रवेश बंदी असतानाही मंदीर उघडून मंदीरात प्रवेश केला. याबाबतची फिर्याद पोलिस हवालदार प्रशांत पाटील यांनी शहर पोलिस ठाण्यात दिली आहे.

भिडे गुरुजींसह सागर आमले, अजय पावस्कर, केदार डोईफोडे, प्रवीण माने, गणेश कापसे, रणजित पाटील, सुदर्शन पाटसकर यांच्यासह 70 ते 80 जणांवर गुन्हा दाखल झाला आहे. याबाबत पोलिसांनी सांगितले की, कोरोनाचा प्रादुर्भाव वाढू नये म्हणून आषाढी वारीसाठी पंढरपूर येथे पायी दिडीं काढून जाण्यासाठी शासनाने बंदी घातली आहे. परंतु ह.भ.प. बंडातात्या कराडकर यांनी शासनाच्या आदेशाचे उल्लघंन करुन आषाढी वारीसाठी जात असताना त्यांना पोलिसांनी ताब्यात घेऊन स्थानबद्ध केले. शासनाने बंडातात्या कराडकर यांच्यासह वारकर्‍यांना वारीसाठी परवानगी द्यावी. या मागणीला समर्थन देत सोमवारी सकाळी साडेदहा वाजण्याच्या सुमारास  संभाजी भिडे गुरुजी दत्त चौक कराड येथे आले. यावेळी त्यांच्यासह शिवप्रतिष्ठान हिंदूस्थानच्या 70 ते 80 धारकरी बंद असलेले साईबाबा मंदीर उघडून आत बसले. त्यामुळे जिल्हाधिकार्‍यांच्या आदेशाचे उल्लंघन झाले आहे.

तसेच कोरोनाचा वाढता प्रादुर्भाव लक्षात घेता परवागनी न घेता, जमाव जमवून मोटर सायकल रॅली काढली. यावेळी रॅलीत सहभागी धारकर्‍यांनी विना मास्क शिवप्रतिष्ठान हिंदूस्थानचा भगवा झेंडा हातात घेवून छत्रपती शिवाजी महाराज स्मारक दत्त चौक ते प्रशासकीय इमारत येथे घोषणा बाजी करत पायी चालत जात तहसिलदार यांना निवेदन दिले. यावेळीही त्यांनी जिल्हाधिकार्‍यांच्या आदेशाचे उल्लघंन केल्याने त्यांच्यावर गुन्हे दाखल करण्यात आले आहेत.

सातारा : सातारा शहर परिसरात मोबाईल चोरणारा अट्टल चोराला पोलिसांनी गजाआड केले असून, त्याच्याकडून ५० मोबाईल हस्तगत केले आहेत. त्यांची एकूण किंमत 5 लाख 700 रुपये आहे. विकास अशोक खंडागळे (वय 29, रा. प्रतापसिंहनगर, खेड, ता. सातारा) असे संशयिताचे नाव आहे.

याबाबत अधिक माहिती अशी कि, दि. 9 जानेवारी रोजी रात्री 11.30 ते दि. 10 जानेवारी सकाळी ७ वाजण्याच्या सुमारास सातारा येथील संभाजीनगरमधील शिवराज पेट्रोल पंपाशेजारील नवीन बांधकाम साईटवर पत्र्याच्या उघड्या शेडमधून एकूण 10 हजारांचे मोबाईल चोरी गेल्याची घटना घडली होती. याप्रकरणी सातारा शहर पोलीस ठाण्यात गुन्हा दाखल करण्यात आला होता. दरम्यान, शहर व परिसरात वारंवार घडणाऱ्या मोबाईल चोऱ्यांचा छडा लावण्याचे मोठे आव्हान शहर पोलिसांसमोर होते. त्यादृष्टीने शहर पोलिस ठाण्यात गुन्हे प्रकटीकरण शाखेने तपास सुरू केला. त्यानंतर शिताफीतीने चोरट्याला पकडून गुन्हा उघडकीस आणला.

पोलिसांनी केलेल्या कारवाईत आरोपी अज्ञात असल्याने रेकॉर्डवरील गुन्हेगार पडताळणी करुनदेखील माहिती प्राप्त होत नव्हती. अशात शिवराज पेट्रोल पंपाशेजारी संभाजी नगर सातारा येथे नवीन बांधकाम सुरू असलेल्या साईटवरील चोरीस गेलेले मोबाईल हे प्रतापसिंहनगर सातारा येथील एका व्यक्तीने चोरले आहेत. अशी माहिती गुन्हे प्रकटीकरण पथकास मिळाली. त्यानंतर गुन्हे प्रकटीकरण शाखेच्या पथकाने तात्काळ प्रतापसिंहनगर येथून दि. 1 जुलै रोजी सायंकाळी संशयितास ताब्यात घेऊन चौकशी केली. त्याने शिवराज पेट्रोल पंपाशेजारी संभाजीनगर सातारा येथे बांधकामाचे ठिकाणी पत्र्याचे शेडमधून मोबाईल चोरी केल्याचे सांगितले. चोरी केलेल्या मोबाईलपैकी एक 5 हजार किंमतीचा मोबाईल फोन हस्तगत केला आहे.

पोलिसांनी आरोपीस अटक करुन तो कोठडीत असताना कसून चौकशी केली असता त्याने आणखी वेगवेगळ्या ठिकाणाहून मोबाईल चोरी केल्याचे सांगितले. पोलिसांनी पोलीस अधीक्षक अजयकुमार बन्सल, अप्पर पोलीस अधीक्षक धीरज पाटील, पोलीस निरीक्षक अण्णासाहेब मांजरे यांच्या मार्गदर्शनाखाली गुन्हे प्रकटीकरण शाखेचे पोलीस उपनिरीक्षक नानासाहेब कदम, पोहवा. गुलाब जाधव, पोलीस नाईक अविनाश चव्हाण, जोतीराम पवार, शिवाजी भिसे, पो.कॉ. गणेश घाडगे, अभय साबळे, संतोष कचरे, गणेश भोंग व विशाल धुमाळ यांनी कारवाईत सहभाग घेतला आहे.