राजकीय

गेल्या रविवारी जवाहरलाल विद्यापीठातील (जेएनयु) विदयार्थी आणि प्राध्यापकांवर झालेल्या हल्ल्यातील अज्ञात हल्लेखोरांची ओळख आम्हाला पटली असल्याची माहिती दिल्ली पोलिसांकडून पत्रकारांना देण्यात आली आहे. याबाबतचे फोटोही पुरावे म्हणून पोलिसांनी पत्रकार परिषदेत सादर केले. आम्ही आत्तापर्यंत काही संशयितांना ताब्यात घेतलेलं नाही मात्र हल्लेखोर डाव्या संघटनांशी संबंधित होते असं गुन्हे अन्वेषण विभागाचे डीसीपी जॉय टिर्की यांनी पत्रकार परिषद म्हटलं आहे.

जेएनयूतील विद्यार्थी आणि प्राध्यापकांवर हल्ल्याच्या घटनेविरोधात निदर्शने करणाऱ्या विद्यार्थ्यांना बॉलिवूड अभिनेत्री दीपिका पदुकोण हीने पाठिंबा दर्शवला होता. यावरुन तिला अनेकांच्या रोषाला सामोरे जावे लागले. यात विशेषकरून भाजपसमर्थित नेते,मंत्री आणि बॉलिवूडच्या काही कलाकारांचा समावेश आहे. नुकतंच केंद्रीय मंत्री स्मृती इराणी यांनी देखील दीपिकावर शरसंधान साधले आहे. ‘भारत तेरे टुकडे होंगे’ म्हणणाऱ्यांसोबत उभी राहिली आहे आणि हा दीपिकाचा अधिकार आहे, अशा खोचक शब्दांत इराणी यांनी दीपिकावर टीका केली आहे. एका कार्यक्रमात उपस्थितीतांच्या प्रश्नाला उत्तर देताना त्या बोलत होत्या.