हॅलो महाराष्ट्र ऑनलाईन । मुंबईत काँग्रेसविरोधात भाजपच्या कार्यकर्त्यांच्यावतीने रस्त्यावर उतरत जोरदार घोषणाबाजी करीत आंदोलन केले. यावेळी भाजप नेते प्रसाद लाड यांनी काँग्रेस कार्यकर्तांना इशाराही दिला. “भाजपच्या आड आले तर आम्ही सोडणार नाही. आम्हीही जशास तसे उत्तर देऊ. हल्ल्याचे उत्तर हल्ल्यानेच दिले जाईल, असे लाड यांनी म्हंटले.
भाजपचे आमदार प्रसाद लाड यांच्या नेतृत्वाखाली आज मुंबईत भाजप कार्यकर्त्यांच्यावतीने काँग्रेस विरोधात आंदोलन करण्यात आले. यावेळी लाड म्हणाले की, भाजपवर कुणी गुंडशाहीने हल्ला करण्याचा प्रयत्न केला तर त्याला त्याच पद्धतीने उत्तर दिले जाईल. आम्ही संघर्ष करणारी लोक आहोत. आम्हाला धमक्या देऊ नका. काँग्रेस भाजपच्या वसंत स्मृतीवर हल्ला करत असाल तर आम्ही उत्तर देऊ, पोलिसांच्या विनंतीमुळे आम्ही थांबत आहोत.
आता जर पोलिसांनी काँग्रेसच्या आंदोलक कार्यकत्यांना अटक केली नाही तर आम्ही येथून पुढे जाऊन आक्रमक पवित्रा घेऊ, असा इशारा प्रसाद लाड यांनी दिला आहे. यावेळी प्रसाद लाड यांच्यासह भाजप कार्यकर्ते व पोलिसांमध्ये काहीवेळी वादावादी झाली. दरम्यान पेगाससच्या विरोधात झिशान सिद्दीकी यांच्या नेतृत्त्वात यूथ काँग्रेसकडून आंदोलन करण्यात येत असल्याने झिशान सिद्दीकी यांच्यासह कार्यकर्त्यांना पोलिसांना ताब्यात घेतले.
