हॅलो महाराष्ट्र ऑनलाईन । गोवा विधानसभा निवडणुक आणि नगरपंचायतीच्या निवडणुकीमुळे सध्या महाराष्ट्रातील वातावरण चांगलेच तापले आहे. अशात भाजपकडून महाविकास आघाडी सरकावर टीका केली जात आहे. भाजप प्रदेशाध्यक्ष चंद्रकांत पाटील यांनी मुख्यमंत्री आणि शिवसेनेवर टीका केल्यानंतर शिवसेना खासदार विनायक राऊत यांनी पाटलांवर निशाणा साधला आहे. चंद्रकांत दादा हे चांगला माणूस कसा बिघडतो त्याचं उदाहरण आहेत. सत्ता मिळत नाही हे लक्षात आल्यामुळे ते सैरभैर झाले आहेत. शिवसेनेला संपवणारा अजून कोणी जन्माला आलेला नाही, असा पलटवार राऊत यांनी चंद्रकांतदादांना केला.
खासदार विनायक राऊत यांनी माध्यमाशी संवाद साधला. यावेळी ते म्हणाले की, आम्हाला महाराष्ट्रात किती आकडे भाजपला मिळाले याची चिंता नाही. आकड्यांची चिंता मुख्यमंत्री करतील, असा सल्ला पाटील यांनी दिला आहे. अशा प्रकारचा अति शहाणपणाचा सल्ला भाजपचे काही लोक देत आहेत तो त्यांनी देण्याची गरज नाही.
मुख्यमंत्री उद्धव ठाकरे यांनी देशपातळीवर मुख्यमंत्री म्हणून नाव लौकिक गाजवला आहे. भाजपच्या लोकांना अशा पद्धतीने डिवचने आणि मुख्यमंत्र्यांच्या नावाने टीका करण्याशिवाय आता कुठलाही धंदा नाही. शिवसेनेला संपवणारा अजून कोणी जन्माला आलेला नाही. राष्ट्रवादी आणि काँग्रेस महाविकास आघाडीचे घटक पक्ष आहेत, ते हसतखेळत शासन चालवत असल्याचे राऊत यांनी सांगितले.
