५ वर्षांच्या मुलाला भेटण्यासाठी पुण्याहून कोल्हापूरला निघालेल्या अभियंता पती पत्नीचा अपघातात मृत्यू

सातारा प्रतिनिधी | सकलेन मुलाणी

कराड तालुक्यातील आशियाई महामार्गावर उब्रंज नजीक भोसलेवाडी येथे शनिवारी (दि.9) रोजी पहाटे 3.45 च्या सुमारास झालेल्या कार अपघातात पतीपत्नी जागीच ठार झाल्याची दुर्दैवी घटना घडली आहे. या घटनेने परिसरात एकच खळबळ उडाली आहे. अमित आपाजी गावडे वय (३८) व  डॉ. अनुजा अमित गावडे वय (३५) असे अपघातात ठार झालेल्या दाम्पत्याचे नाव आहे.

हे दाम्पत्य पुण्याहून कोल्हापूरला मुलांना आणण्यासाठी जात असताना कारवरील ताबा सुटल्याने कार रस्तालगतच्या डिव्हायडरला धडकली आणि सातारा लेनवर पलटी झाली. त्यामुळे हे पतिपत्नी जागीच ठार झाले. अपघातात मृत पावलेला तरुण पुणे येथे एका आयटी कंपनीत अंभियंता म्हणून कामाला असल्याची माहिती मिळाली आहे.

अपघातानंतर चालक गाडीमध्ये अडकला होता. कटावणीच्या साह्याने दार तोडुन त्याला बाहेर काढण्यात आले. या अपघातात कारचा चक्काचूर झाला आहे. अपघाताची माहिती मिळताच हायवे हेल्पलाइन कर्मचारी दस्तगीर आगा, अमित पवार, सलिम देसाई, रमेश खुणे व उब्रंज पोलिस पोलिसांनी घटनास्थळी धाव घेवून मदतकार्य केले. अपघाताने पंचक्रोशीत हळहळ व्यक्त होत आहे. घटनेचा पुढील तपास पोलीस करत आहेत.

ब्रेकिंग बातम्या मोबाईलवर मिळवण्यासाठी आम्हाला 7972630753 या नंबरला WhatsApp करा आणि लिहा “Hello News’.