औरंगाबाद – प्रजासत्ताक दिनानिमित्त प्रधानमंत्री रॅलीमध्ये महाराष्ट्राचा राष्ट्रीय छात्र सेनेच्या (एनसीसी) संघाने उत्कृष्ट कामगिरी करत प्रथम पारितोषिक पटकावले. या संघातील देवगिरी महाविद्यालयाचा विद्यार्थी सिद्धेश आप्पासाहेब जाधव यांना ‘प्राइम मिनिस्टर्स बॅनर’ (पंतप्रधान ध्वज) स्वीकारण्याचा मान मिळाला आहे. त्याने पंतप्रधान नरेंद्र मोदी यांच्या हस्ते हा मानाचा ध्वज स्वीकारला.
देवगिरी महाविद्यालयाच्या 51 महाराष्ट्र बटालियन एनसीसी चा कॅडेट सिनिअर अंडर ऑफिसर सिद्धेश जाधव यांनी दिल्ली येथे फिल्ड मार्शल करिअप्पा परेड मैदानावर काल झालेल्या पीएम राहिली 2022 मध्ये सहभाग घेतला. राज्याच्या संघाने या रॅलीमध्ये सर्वोत्कृष्टत्तेचा पंतप्रधान ध्वज स्वीकारला. ध्वज स्वीकारण्याचा मान सिद्धेश ला मिळाला आहे. या वेळी संरक्षण मंत्री राजनाथ सिंग यांच्यासह लष्कर, हवाई दल आणि नौदलाचे प्रमुख उपस्थित होते.
या संघामध्ये निवड होण्यासाठी मागील दोन महिन्यांपासून शिबीर सुरू होते. त्यातून संघाची निवड केली नऊ जिल्ह्यांच्या औरंगाबाद एनसीसी विभागातुन राज्याच्या संघात तीन कॅडेटची निवड झाली. त्यात सिद्धेश समावेश होता. देवगिरी महाविद्यालयात अकरावीपासून शिकत असून सध्या तो बीएससीच्या प्रथम वर्ष व एनसीसीच्या तृतीय वर्षात आहे. या यशाबद्दल मुख्यमंत्री उद्धव ठाकरे, क्रीडा मंत्री सुनील केदार, प्राचार्य डॉ. अशोक तेजनकर, एनसीसीचे अधिकारी कॅप्टन डॉ. परशुराम बाचेवाड यांच्यासह महाविद्यालयातील उपप्राचार्य, प्राध्यापक, विद्यार्थ्यांनी अभिनंदन केले.
