फलटण | फलटण तालुक्यातील बरड येथे व्हॉटसअप ग्रुपवर चार चाकी गाडी विकणे आहे, असा फोटो का पाठवला म्हणून एकास 7 जणांनी जातीवाचक शिवीगाळ करुन मारहाण केल्याप्रकरणी फलटण ग्रामीण पोलिस ठाण्यात गुन्हा दाखल झाला आहे. यातील सहाजणांना अटक करण्यात आली असून एकजण अल्पवयीन आहे. याबाबत अक्षय पिलाजी आवटे (वय 18, व्यवसाय शिक्षण) यांनी फिर्याद दिलेली आहे. विशाल सुरेश मदने, पवन मधुकर जाधव, रमेश मधुकर जाधव, करण पांडुरंग कोळी, ऋषिकेश भगवान कोळी, वाघेश्वर आडके (सर्व रा. बरड) असे अटक केलेल्या संशयितांची नावे आहेत.
याबाबत फलटण ग्रामीण पोलिसांकडून मिळालेली माहिती अशी, गुरुवार दि. 29 जुलै रोजी रात्री बरड गावच्या हद्दीत खंडोबा मंदिरा जवळ फिर्यादी व त्याचा मित्र प्रसाद लोंढे बसले होते. दरम्यान, तेथे संशयित मोटार सायकलीवरुन आले. त्यांना फिर्यादी होलार समाजाचा आहे हे माहीत असताना तू आमचे रॉयल रामोशी ग्रुप बरड या व्हॉटसअॅप वर मनोज काशिद यांचे ईको गाडी विकणे आहे असे लिहन (एम एच 12 एच व्ही 6724) या गाडीचा फोटो का टाकला, असे विचारले.
तसेच विशाल मदने, ह्याक पवन जाधव, रमेश जाधव या तीघांनी फिर्यादीला हाताने व सर्व लाथाबुक्यांनी मारहाण करुन जातीवाचक शिवीगाळ केली. तसेच फिर्यादीला उचलून जमीनीवर आपटले. त्यावेळी तेथे हजर असणारे करण कोळी, ऋषिकेश कोळी, वाघेश्वर आडके यांनी याला आता सोडू नका, जोरात मारा, याला कोण सोडवायला येत नाही. आम्ही बघतो असे म्हणून शिवीगाळ दमदाटी केली असल्याचे फिर्यादीत म्हटले आहे. या घटनेची फलटण ग्रामीण पोलिस ठाण्यात नोंद झाली असून संशयितांना अटक करण्यात आली आहे. तपास उपविभागीय पोलिस अधिकारी तानाजी बरडे करत आहेत.
