हॅलो महाराष्ट्र ऑनलाइन | राज्याचे मुख्यमंत्री आणि शिवसेना पक्षप्रमुख उद्धव ठाकरे यांची आज औरंगाबाद येथे सभा असून त्यापूर्वीच मनसे नेते संदीप देशपांडे यांनी मुख्यमंत्र्यांवर टीकास्त्र सोडलं आहे. त्यावरून शिवसेना खासदार संजय राऊत यांनी विरोधकांवर जोरदार प्रतिहल्ला केला. विरोधकांचे तोंड म्हणजे तोंड नसून गटार आहे अशी जळजळीत टीका संजय राऊत यांनी केली.
संजय राऊत यांनी आज प्रसारमाध्यमांशी संवाद साधला. त्यावेळी ते म्हणाले, विरोधकांचं तोंड म्हणजे गटार आहे. राज्याच्या मुख्यमंत्र्यांविषयी काय बोलावं, कसं बोलावं याचं भान त्यांनी ठेवलं पाहिजे. शिवसेनेच्या पक्षप्रमुखांविषयी तुमचा व्यक्तिगत द्वेष असू शकतो. पण अशाप्रकारे तुमच्या तोंडातून जर भिजलेले फटाके फुटणार असतील, तर त्याची पर्वा आम्ही करत नाहीत. असे प्रत्युत्तर संजय राऊत यांनी मनसेला दिले.
दरम्यान, उद्धव ठाकरे यांच्या आजच्या सभेला संपूर्ण मराठवाड्यातून लाखो शिवसैनिक येतील. बऱ्याच काळानंतर राज्याचे मुख्यमंत्री हे मुंबईच्या बाहेर जाऊन सभा घेत आहेत. त्यामुळे शिवसैनिकांच्या मनात मुख्यमंत्र्यांबद्दल आकर्षण आहे असे संजय राऊत यांनी म्हंटल. राज्यात बरंच काही राजकीय घडामोडी घडत आहे. त्यामुळे उद्धव ठाकरे आज नेमकं काय बोलणार?? किंवा विरोधकांना काय प्रत्युत्तर देणार याकडे संपूर्ण महाराष्ट्राचे लक्ष लागले आहे.