गडहिंग्लज : हॅलो महाराष्ट्र – कोल्हापूर जिल्ह्याच्या गडहिंग्लज तालुक्यात एक मन हेलावून टाकणारी घटना घडली आहे. यामध्ये एकुलती एक मुलगी घरातून निघून गेल्याच्या कारणातून एका 52 वर्षीय पित्याने आपल्या आयुष्याचा हृदयद्रावक शेवट केला आहे. एकुलती एक मुलगी चार दिवसांपूर्वी घरात कोणालाही न सांगता निघून गेल्याने नैराश्यात गेलेल्या पित्याने आपल्या राहत्या घरात गळफास घेऊन आत्महत्या केली आहे. या घटनेची माहिती हलकर्णी पोलिसांना देण्यात आली असून पुढील तपासाला सुरुवात केली आहे.
रामा शट्याप्पा इरगार असे आत्महत्या करणाऱ्या बापाचे नाव आहे. ते गडहिंग्लज तालुक्यातील कवळीकट्टी या ठिकाणचे रहिवाशी आहेत. आपली एकुलती एक मुलगी घरातून निघून गेल्याने रामा शट्याप्पा इरगार यांना नैराश्य आले होते. याच नैराश्यातून त्यांनी आपल्या आयुष्याचा शेवट केला आहे. पोलिसांनी दिलेल्या माहितीनुसार, मृत रामा इरगार हे कवळीकट्टी या ठिकाणच्या रयत गल्लीत राहत होते.मात्र त्या ठिकाणचे जुनं घर मोडकळीस आल्याने अलीकडेच ते आपली पत्नी आणि मुलीसह नवीन घरात राहायला आले होते.
दरम्यान चार दिवसांपूर्वी मृत रामा शट्याप्पा इरगार त्यांची एकुलती एक मुलगी घरातून अचानक गायब झाली. यानंतर रामा शट्याप्पा इरगार यांनी आणि कुटुंबातील इतर सदस्यांनी मुलीचा सर्वत्र शोध घेतला. पण तिचा कुठेच पत्ता लागला नाही. चार दिवसानंतरही मुलगी घरी परतली नसल्याने मृत रामा शट्याप्पा इरगार यांना नैराश्य आलं होतं. यातूनच रामा शट्याप्पा इरगार यांनी रयत गल्लीतील आपल्या जुन्या घरात तुळईला गळफास घेऊन आत्महत्या केली. या घटनेमुळे परिसरात एकच खळबळ उडाली. या घटनेची माहिती पोलिसांना मिळताच त्यांनी आकस्मिक मृत्यूची नोंद करून घटनेचा पुढील तपास सुरु केला आहे.
